ORANJESTAD – Pa prome biaha den historia, Nacionnan Uni ta presenta un reconocemento na un Arubiano pa su trabou na beneficio di paz na mundo. E reconocemento aki ta dedica na Michael Kip, kende a fayece na 2005 mientras cu e tabata den un mision na Ghana. Prome Minister Mike Eman tabatin e honor di haci entrega oficial di e premio ‘Dag Hammarskjöld’ na Tata y rumannan di Michael Kip durante un ceremonia chikito y solemn.

E momento masha special y unico a tuma luga diaranson atardi den sala di presentacion di edificio Cocolishi di Gobierno di Aruba. Un ocasion cu a warda 10 aña pa concretiza y cu finalmente famia Kip por a experiencia.

E nomber di e premio ta basa riba e diplomatico, autor y economista Sueco, di mesun nomber, cu tabata e di dos Secretario General di Nacionnan Uni y a fayece den un accident di avion na 1961. E ta un di djis tres persona na mundo cu a yega di ricibi un premio Nobel di Paz di manera postumo.

Michael Kip cu apenas 22 aña a cuminsa su carera na Nacionnan Uni na New York. Danki na su propio motivacion y e facilidad cu, como Arubiano e tabatin pa papia varios idioma, rapidamente el cuminsa acumula responsabilidadnan y asina participa den e misionnan di Nacionnan Uni rond mundo. El a traha na Mozambique, Baghdad y Kosovo.

Den nomber di famia, su ruman muhe Janine Kip a hiba palabra resumiendo e carera significativo di Michael, pero papiando tambe di su caracter hopi popular. Un di e aspectonan resaltante di e bida di Michael ta e amor gran cu e tabatin pa su isla y con incansablemente el a promove esaki den tur skina di mundo cu el a bishita.

Prome Minister Mike Eman a expresa na momento di entrega di e reconocemento, con sumamente honra e ta sinti di por contribui na conmemora e vida y trabou di Michael. Su spiritu comunitario ta den mesun liña cu e vision y mision di Gobierno pa fomenta mas den nos comunidad e sinti di comparti y coopera mas cu nos prohimo.

Despues di e parti oficial di e ceremonia, famia y amigonan a keda combersa cu Ministernan y conta algun di storia y anecdota cu mas nan ta recorda di Michael. E ceremonia a conta tambe cu presencia di Ministernan Otmar Oduber, Benny Sevinger y Angel Bermudez.

Expresionnan haci den e articulo aki no necesariamente ta refleha opinion di ArenaPoliti.co