Klem party como solucion: Aruparking ta premira cu placa no ta alcansa y ta cuminsa pone klem hasta riba autonan cu staciona malo, por ehempel ariba acera, aunke ley ta bisa cu e unico cu mag di duna boet den un caso asina ta polis di Korps Politie Aruba. Awor hopi hende ta disgusta pasobra e parkinglotnan a bira parklemlot y Aruparking ta tene klem party ariba e parklemlotnan di centro di ciudad y hendenan a cuminsa kibra nan pasobra nan ta haña cu nan no a merece un klem of gewoon pasobra nan no a wak’e. Aruparking a dicidi di cobra pa e daño 1000 florin. Di biaha mi a bay wak riba eBay y a encontra e mesun klemnan aki pa 57 dollar. Kiermen ta un abuso nan ta haci pa ranca placa di pueblo pa logra yega na e 2 miyon florin pa paga nan salario. Nan ta para manera zamuro pa wak si bo a pasa bo ora pa nan por klem bo auto y bo ta wak nan sinta ta vigila autonan cu ta casi yega na e orario di parkeer.

Argumento di Aruparking: Aruparking kiermen cu nan a cumpra e klemnan di un compania cu yama All-Inn-Energy cual ta representa e compania Mackay Meters di Canada cu ta encarga cu Parkeermeters y Klem. E tristo ta cu ora bo busca na e compania Mackay Meters pa klem ta resulta cu nan no ta traha ni bende wiel klem. Pero si nan tabata bende mes, cua loco ta paga 500 dollar pa un wiel klem cu bo por cumpra pa 50 dollar? Bo ta haci bo research promer cu bo cumpra algo toch? Minister pa haci damage control a dicidi di Google su mes y el a encontra e wiel klem caro riba Google na un tal Parking Lot warehouse y a dicidi di contradeci Aruparking den su clarificacion riba compra di wiel klem. E pregunta di pueblo mester ta, ken ta papia berdad, Aruparking, e minister of niun di dos? Si e wiel klemnan aki ta di tanto bon calidad dicon e no por cumpli cu su trabao di stop un auto sin cu e ta kibra of sin cu dos dama cu nan huña largo por los’e cu nan gancho di cabey? Hecho ta cu no tin hustificacion pa cumpra un wiel klem cu ta costa 10 biaha mas cu e prijs averahe di wiel klem.

Conclusion: E compania aki no por cumpli cu su gastonan sin abusa di pueblo. Arubus lo no haña ni 1 florin di Aruparking. Esnan cu tin salario minimo mester entrega pa un grupito por biba bon. Ni Aruparking ni minister no a convence pueblo cu nan clarificacion dicon ta paga 500 dollar pa un wiel klem cu ta costa otro caminda 50 dollar pa e mesun klem.
Por ultimo, Aruparking na momento aki no ta un bon welcome na clientenan di centro di ciudad. Nan a bin pa yuda drecha e problema di centro di ciudad  of pa duna trabao na campañadornan di Otmar?

Expresionnan haci den e articulo aki no necesariamente ta refleha opinion di ArenaPoliti.co