Placa na abundancia den caha di gobierno na 2009 

Despues cu MEP den su ultimo comunicado di prensa a trece padilanti e desaster financiero economico cu Gabinete Oduber a hereda for di AVP na 2001, den e comunicado aki nos partido lo elabora riba tur locual MEP a laga atras na final di su gobernacion na 2009. Contrario na e hecho cu Gabinete Oduber a haya solamente debe y mas debe di mas cu 850 miyon florin pa paga na 2001, Gabinete Mike Eman a cay den bonanza di placa, ya cu nan a hereda sumanan miyonario na momento cu nan a asumi gobernacion na final di 2009.

Herencia di 970 miyon florin
Gabinete Eman a hereda for di Gabinete Oduber 250 miyon florin di placa di Plant N.V., 280 miyon florin di BBO riba export di Valero, 190 miyon florin di Fondo Desaroyo Arubano (FDA), casi 200 miyon florin di 3% di BBO, mas cu 10 miyon florin di ganashi di Banco Central y mas cu 40 miyon florin cash. Pues aki nos ta papia di un suma total di 970 miyon florin cu nan a hereda for di e gobierno di MEP! Y asina mes hayando tur e suma aki nos ta haya un Rene Herde cu tur dia ta grita cu AVP a haya e caha di gobierno blo bashi na 2009.

Crea debe y mas debe
Sinembargo remarcabel ta cu – asina mes cu Gabinete Eman a haya e suma di 970 miyon florin pa nan por a inverti sin ningun dolor di cabes manera cu Gabinete Oduber si a haya na 2001 – toch nan a dicidi di fia y sigui fia den e siguiente 5 añanan aumentando nos debe nacional for di 2.2 biyon florin na 2009 te na 3.8 biyon florin na 2014, un aumento di 1.6 biyon florin! Hecho ta cu si durante Gabinete Oduber nos debe nacional a crece cu un promedio di 91 miyon florin pa aña, bao di Gabinete Eman esaki a crece cu un promedio di 328 miyon florin pa aña, pues cu casi 4 biaha mas hopi! Aki si Rene Herde su mente ta stop di traha, ta bay den un ‘denial mode’ y ta cuminsa papia barbaridad di cu 91 ta mas cu 328!

Proyectonan cla pa ehecuta
Fuera di e suma di 970 miyon florin, Gabinete Oduber tabata tin cla aproba pa ser ehecuta: 1. E hotel di 5 strea Ritz Carlton , 2. Construccion di HAVO/VWO school na Noord, 3. Renobacion y expansion di Corte di Husticia, 4. Cas pa anciano na Palisiaweg, 5. Casnan social na Palisiaweg, 6. Hospital nobo na San Nicolas, 7. Renobacion di Maria College y Rosario College, 8. E parkenan deportivo na Santa Cruz, Pos Chiquito y Yara, 9. E area comercial di Arubus na San Nicolas, 10. Mudamento di haf industrial pa Barcadera, 11. Embeyecimento di centro di ciudad, 12. Linear Park, 13. Hotel Grand Melia, 14. 11 bus Chines cu airco etc. Alavez gobierno di MEP a laga inversionnan grandi atras den ehecucion pa WEB N.V., manera 2 planta mas di RECIP di Wärtsila, un planta di awa Seawater Reverse Osmosis di 8000 ton y10 molina di biento na Vader Piet.

Aruba degrada na un rating BBB-
Asina pues nos por mira cu Gabinete Oduber a laga un pais den pleno desaroyo atras na 2009, cu hopi placa den caha di gobierno pero cu lamentablemente Gabinete Eman no a sigui cu e desaroyo positivo aki. Nan a malgasta tur placa cu tin y despues a bay over na fia y sigui fia riba custia di pueblo. Consecuencia directo di nan maneho desastroso tabata cu nos pais a wordo degrada for di un Credit Rating A- na 2009 te na un rating di BBB- na 2014. Esaki ta un confirmacion cu e gobierno di AVP no sa con pa goberna e pais aki y cu nan por a yega den goberncion solamente door di manipula, gaña y haci show tur dia pa e pueblo por baila riba nan ritmo musical.
Finalmente partido MEP kier a puntra Rene Herde, na kico su gobierno a malgasta e mas cu 2.5 biyon florin extra cu nan a haya , esta e 970 miyon florin cu nan a hereda for di MEP y e 1.6 biyon florin cu nan a fia durante e prome 5 añanan di nan gobierno?

Expresionnan haci den e articulo aki no necesariamente ta refleha opinion di ArenaPoliti.co