E ta orador na varios occasion poniendo Aruba briya den luz positivo  

ORANJESTAD - Mientras cu un delegacion di Aruba encabeza pa Minister Sevinger a biaha diasabra pa Paris pa atende e cumbre importante COP21, Prome Minister Eman a dicidi di keda Aruba pa sigui di cerca e desaroyonan y duna man den yuda den buskeda di un grupo di hende abordo di un yate cu a haya su mes den problema riba lama. Despues di algun dia di angustia, e rescate tabata exitoso y tur hende ta sano y salvo na Colombia. Prome Minister Eman, manera un berdadero lider, a keda aki cu su hendenan y ta biaha dialuna pa Paris.

Presencia di Aruba na Paris ta di gran importancia. Esey prome Minister a enfatisa, pero tambe e ta consciente cu paisnan grandi tin mayor influencia riba e acuerdo cu ta wordo cera. “Pero, si ta asina cu durante e ultimo añanan SIDS (Small Islands Developing States) a haya un bos mas fuerte den mundo y riba plataforman asina. Specialmente e islanan den Pacifico cu ya caba ta biba e realidad di e ‘global warming’ unda e nivel di awa di lama ta lantando. Tin cierto islanan cu ta premira cu den un tempo hopi limita nan ta bay haya nan mes confronta cu situacionnan no deseabel cu cambio di clima ta trece cu ne. Aruba no tin e problemanan ey awor ainda y ta bay dura mucho mas tempo cu pa e islanan aki.” Eman a splica cu ya caba tin pronosticonan cu islanan den Pacifico dentro di no mucho tempo lo no existi mas pa motibo di global warming. “Esaki a pone cu nan bos ta birando mas fuerte. Nan ta biba e realidad caba y nan ta wordo scucha hopi mas lihe cu antes. E tamaño so di e isla/pais no ta determina cuanto di bisa bo tin den henter e discusion aki. Kico ta e pasonan cu mester bay tuma pa reduci global warming y eventualmente pare, ta un asunto di nos tur Tambe bos di islanan chikito cu podise no ta influenciando global warming, pasobra nan footprint di CO2 ta masha limita den mundo, pero si nan ta e victimanan di e desaroyo aki, ta wordo hopi miho scucha.”

Den caso di Aruba no tin e menasa mes eminente manera islanan Pacifico. “Asina mes Aruba un bes mas ta haya reconocimento, mirando cu nos ta un di e islanan den mundo cu tin un agenda hopi ambicioso pa na 2020 ta 100% sostenibel y nos tin un consistencia den realisa e programa aki loke den mundo ta hayando hopi simpatia, sosten y admiracion. Esey ta duna Aruba, pa chikito cu nos por ta, un posicion di renombre den e mundo grandi aki.” Aruba ta sigui su curso cu pasonan sigur. Prome Minister ta duna su discurso, sin duda elocuente, pa asina pone Aruba briya den luz positivo

Expresionnan haci den e articulo aki no necesariamente ta refleha opinion di ArenaPoliti.co