Siman pasa a drenta e noticia cu e empresario Roberto Rincon a cay den man di husticia Mericano bou di sospecho di labamento di placa y soborno. E berguensa ta cu den e mesun rosea nos por lesa den prensa internacional e nombernan di Ministernan Eman y De Meza y tambe di nos Minister di Turismo Oduber kendenan ta wordo catergorisa como bon amigo di Roberto Rincon. Di e manera aki e nomber di Aruba ta bolbe wordo susha den exterior pa Ministernan di Gabinete Eman.

Amigo di El Pollo Carvajal
E nomber di Roberto Rincon a cuminsa razona aña pasa na momento cu e mayor general Venezolano El Pollo Carvajal, kende ta wordo busca pa Merca, a wordo deteni na Aruba. El Pollo ta amigo di Rincon y cu avion priva di Rincon tabata viaha bin Aruba. Asina nos por lesa den prensa internacional cu Rincon mes a biaha 28 ves den su avion priva pa Aruba entre 2011 pa 2013.

Soborno pa yega na contracto cu PDVSA
Roberto Rincon kende ta un contratista den e mundo petrolero ta wordo sospecha di ta soborna trahadornan di PDVSA pa asina por yega na contractnan luctrativo den e refineria. Prensa internacional ta indica cu Rincon lo a paga 2,5 miyon dollar na un solo trahador di PDVSA pa asina yude yega na contracto. Remarcabel ta cu ta net Rincon ta e persona cu Minister De Meza a indica cu tabata yuda e mandatario como intermediario pa e reapertura di e refineria na Aruba. Awor si e modus operandi di Rincon ta soborno, ta ken por sigura nos cu Ministernan De Meza y Eman no a haya placa di soborno pa campania electoral? Ken por sigura nos cu e mandatarionan aki no a yuda Rincon pa haya contracto lucrativo tambe cu apertura di e refineria na nos Pais?

Propiedad na Aruba
Prensa internacional ta menciona cu Rincon ademas di tin bon amistad cu e Ministernan di Gabinete Eman tambe lo tin varios propiedad riba nos Pais. Nos a compronde cu ta trata aki di e compleho di apartamento luhoso Coral Pyramid. Banda di esaki nos a compronde cu Rincon lo tin shares tambe den un cerveseria y un car dealer na Aruba.

Preguntanan official pa Gabinete Eman
Den e dianan nos dilanti Fraccion di MEP lo haci preguntanan oficial na Gabinete Eman pa asina Pueblo por haya un splicacion ta kiko ta e relacion di e Ministernan di Gabinete Eman cu Roberto Rincon. Tambe nos lo pidi Gobierno pa mustra ta cual ta e propiedadnan di Rincon na Aruba. Pasobra ora Merca ta busca esnan cu ta laba placa, nan ta tuma nan propiedad den beslag pa despues bende nan y e placa di benta ta wordo hinca den un pot pa financia e lucha contra labamento di placa. Berguensa ta cu e Ministernan di Gabinete Eman nan nomber tambe lo wordo menciona den e investigacion contra Rincon y di e manera aki e nomber di Aruba ta bolbe wordo susha den exterior pa Ministernan di Gabinete Eman.

29 augustus 2015

Expresionnan haci den e articulo aki no necesariamente ta refleha opinion di ArenaPoliti.co