Entrante awe 26 di januari Parlamento di Aruba lo inicia cu tratamento di presupuesto 2016. Sinembargo den e Ley di CAFT ta ancra cu promer cu 15 di december 2015 presupeusto di aña 2016 lo mester a wordo aproba. Despues di hopi lobbymento na Hulanda a convence e “Hulandesnan” pa asina AVP haña un extension te cu 31 di januari 2016. Manera nos por recorda e 8 añanan di oposicion di AVP, 2001-2009 nan tabata hopi critico riba MEP relaciona cu presupuesto di nos pais. MEP no por tabata un luna laat y ya AVP tabata sapatia. Te hasta AVP a priminti siendo den oposicion cu nan tin no 1 pero 2 presupuesto alternativo di FESCA e tempo aya. Ora a haña oportunidad pa goberna por a tuma nota cu AVP ta “hopi scuma pero poco chuculati” cual a conduci te hasta na un KB y bebemento di Ensure bao tent. Wel e siman aki lo bira un siman hopi interesante pa Parlamento di Aruba, primordialmente e “coro” cual tin custumber di grita “VOOR” segun instruccion di nan partido. Tin consehonan negativo di Raad van Advies y tambe conseho negativo di CAFT relaciona cu e presupuesto presenta. Por tuma nota cu gobierno no a haci ningun ahustacion y no a tene cuenta cu e consehonan aki tampoco  pero ta “BOM” cos bay. Por ehempel, gastonan total di gobierno encomparacion cu 2015 a bolbe subi cu mas di 9 miyon florin. Mike Eman na biahamento pa su so tin 700 mil presupuesta. Ta “LUNA” so Mike no a bay ainda. Ainda falta!! Aumento total den biahamento di 25%. Un otro  abuso ta gastonan di e cartera di  Promer Minister  relaciona cu huurmento di edificio cual a aumenta cu 30% compara cu 2015. Fiesta cu companianan di amigo manera entre otro “Tera Group” y “Paxi” di Patrick Paskel y esposa  pa propaganda e ministernan nan trabao a aumenta cu 47% y lo alcansa un total di 3 miyon florin den 2016.  Gastonan pa paga abogado y consehero di solamente Mike Eman a conoce un aumento di 21% alcansando un gasto total pa tur minister di 15 MIYON pa 2016. Na Dividend di companianan estatal a wordo ranca den 2015 un total di 32 MIYON incluyendo UTILITIES cu tanto Mike & Mike a gaba cu AVP no lo mishi. Pa 2016 esaki ta presupuesta na 19 MIYON pa un total di 175 MIYON chica den 6 aña di AVP. Mientras e deroche aki ta tumando lugar pa gobierno hiba un bida di luho, gobierno a corta 16 MIYON den Husticia desde 2013 pa awor. Aki mester constata pakico criminalidad ta unda cu e ta awe. No tin placa ni pa school di Polis, pues den 2016 atrobe school di Polis lo ta cera.  Mensahe na tur e parlamentarionan di AVP, corda riba boso propio yiunan kendenan bosonan ta marando na man cu pia pa e proximo 30 añanan nos dilanti cu boso decisionnan. Gritando “VOOR” sin mas manera e presupuesto ta actual, keremi cu lo bay tin consecuencia cu Hulanda lo drenta pa mara boso mannan y boso lo sufri finalmente di un berguensa nacional unda TRIBUNAL di Pueblo lo huzga cada un di bosonan.  No haci cu henter un pueblo locual Bo no kier nan haci cu Bo.

Expresionnan haci den e articulo aki no necesariamente ta refleha opinion di ArenaPoliti.co