Mervin Wyatt-Ras (AVP): Dialuna Parlamento lo trata dos ley importanta pa nos salud: e ley di Calidad di Salud y BIG
![Mervin04](/images/400x210/Mervin04.jpg)
Pa loke ta trata e ley di BIG por bisa cu e ley aki ta reglamenta cu dunadornan di cuido por registra y tin cu atene nan mes na diferente exigencianan pa cu esaki, segun un procedura fiho. Tin e profesionnan cu ta cai bao tuchtrecht, cualnan ta mediconan, specialistanan y den e ley e grupo a keda aumenta cu mas profesional.Esnan cu ta wordo registra ta e dokternan, dentista, boticarionan, parteranan, fysiotherapistanan y verpleegkundigen. Ta reglamenta cual profesional ta autorisa pa haci cierto trabounan,. E exigencianan pa e tereno di experticio lo ser regla via landsbesluit. Tin articulo cu ta reglamenta e titulo di e profesional y definicion di experticio. Ta reglamenta alavez procedura di registracion y rekisitonan. Ta registra fam, nombernan, sexo, fecha di nacemento, nacionalidad, adres, tipo di diploma, number e fecha di registracion, tereno di experticio pa cual ta ser registra, si tin un of otro limitacion. Tambe ta reglamenta a base di ki argumento minister por nenga un peticion pa registracion, ki ora e registracion ta caduca, ontheffing, y ta fiha den ley cu informacion den registro por ser uza pa haya un bista di diferente desaroyo pa fiha maneho. Diferente tratamento ta ser describi y ken ta autorisa pa ehecuta nan. Alavez ta regla competencia di diferente profesion. Tin articulo cu ta reglamenta e capacidad of experticio di e dunador di cuido. Tin un articulo cu ta trata secrecia pa cu informacion. Ta ser reglamenta cu tanten no tin un Instituto di Calidad lo tin un comision pa toets of evalua profesionalnan. Semejante na e ley di Calidad di Cuido diferente di e articulonan tin mester di un landsbesluit pa por ser concretisa. Minister a indica na Parlamento cu e lo traha na un forma diligente y lo presenta dentro di poco, esta entrante januari 2015 un plan di implementacion pa ehecucion di e leynan. Parlamento den reunionnan di comision di Asuntonan Social y Salubridad, desde fin di oktober a reuni cu stakeholders ariba tereno di salud. A manda preguntanan pa minister reflehando e preocupacion di e diferente stakeholders. E preguntanan a ser constesta den un “Nota naar aanleiding van het verslag” y dialuna dia 8 di December cuminsando 9 or lo trata e ley den reunion publico. Mervin Wyatt-Ras ta spera cu e preparacion di parlamentario den e comision lo yuda pa haci e debate uno dirigi y eficiente cu e meta principal cu nos por yega na calidad di cuido mas halto un bon sistema di registracion y fortifica control y supervision necesario y cu ora nos hendenan bira malo nan por ta sigur cu nan por haya un cuido responsabel, dirigi ariba e cliente cu ta acudi pa cuido, cumpliendo cu normanan internacional, locual den futuro alavez por habri porta pa nos paisa alavez di por drenta e mercado di turismo medico.
Expresionnan haci den e articulo aki no necesariamente ta refleha opinion di ArenaPoliti.co