No ta for di awor pero for di algun anja caba nos a senjala cu nos turismo no ta loke minister Otmar Oduber ta pretende cu e ta. Nos a constata cu anualmente 70 miyon florin ta wordo hinca den mercadeo y pueblo no ta mira e resultado bek den cantidad di placa cu ta wordo laga atras. E motibo principal pa trece turista ta pa nan gasta placa y laga placa atras den nos economia.

Den 6 anja Otmar Oduber a hinka 420 miyon florin den mercadeo y awe tur hende por sinti y mira e resultado. E resultado ta cu NO a trece e ‘’affluent tourist’’ pero mas bien a trece turistanan cu NO ta gasta placa. E ora nos tin cu puntra nosn mes si placa no a wordo benta afo?? No ta nos so como fraccion di MEP a constata esaki sino Banco Central, AHATA y hasta sr Eduardo de Veer a constata cu turistanan no ta gasta placa. Tur hende a yega na mesun conclusion cu e turistanan cu Aruba semper tawata tin NO tey mas. Un cos ta sigur, Otmar su maneho a fracasa, Otmar a faya y awe tur hende ta sintiendo e efectonan.

Na momento cu bo ta sirbi un pais bo mester keda cu bo pianan riba tera y bo mester accepta y reconoce ora cosnan no ta bai bon y tuma accion. Tin e situacion di Caya Betico Croes caminda 30 tienda a sera nan portanan y e motibonan ta conoci. Comerciantenan a bisa cu loke a mata nan negoshi tawata e proyecto di renobacion a dura mucho largo, e tram a causa cu benta a bai atras y e parkeermetersnan a caba di mata nan. Envez cu Otmar Oduber accepta esaki y reconoce cu tin un problema e ta bai culpa comercio cu ta nan mesun culpa cu nan tienda ta sera y cu ta na mesun culpa cu nan no ta bende pasobra nan no a inverti y nan no a inova. Ora un hende no kier accepta y biba cu e realidad ta pasobra e la bira igonorante pa e problemaman. Bo tin problema serio ora bo no kier accepta cu Caya Betico Croes a wordo mata. No solamente Caya Betico Croes sino na Aruba 75 tienda a sera nan portanan y esaki ta pa via di e situacion economico.

Banco Central a bisa den su rapport di anja 2015 cu e anja a sera cu 0% crecemento economico y esaki ta debi na un turismo debil y cu turistanan no ta gasta placa. No solamente Banco central a senjala esaki sino AHATA tambe a bisa mesun cos .

Mi ta pone textualmente loke AHATA a bisa pasobra NO ta ami a bisa esaki sino AHATA: ‘’ minister di turismo y ATA ta presenta un situacion cu no ta cuadra cu realidad’’. Bisando esaki AHATA ta confirma tur e trocemento di berdad di Otmar Oduber y bisa cu nos a wordo enganja tur e temponan aki pa e minister di turismo. Mas aleu AHATA a bisa: ‘’ Tambe adhunto tin un grafico cu ta mustra cu GDP di Aruba den ultimo 10 anjanan a baha. Minister di turismo y ATA ta pretende cu turismo a subi, wel si turismo ta representa 90% di nos economia y ta bayendo asina great, con por ta GDP a cai’’? Bisando esaki AHATA ta reafirma nos preocupacion y ta desenmascara Otmar Oduber su ganajmento.

Finalmente sr Eduardo de Veer a bisa publicamente cu e cantidad di ‘’affleunt traveler’’ a baha. Tin un percepcion cu ta “mik” riba e affluent traveler, pero e cifranan di CBS ta mustra cu nan no ta biniendo Aruba, pero e cifra di turista di budget si a subi.

Awor si Otmar Oduber no kier accepta loke Banco Central ta bisa, loke AHATA ta bisa y loke Sr De Veer ta bisa ta pasobra e kier ta ciego y sordo pa e realidad y kier keda ignorante! Ignorando e problemanan aki nos no ta solucionanan! Nos kier solucion, nos kier midi rendimiento di e placa cu ta wordo inverti den mercdeo. Nos kier explora mercadonan nobo y busca turistanan cu di berdad lo duna un contribucion na nos pais.

Expresionnan haci den e articulo aki no necesariamente ta refleha opinion di ArenaPoliti.co