E ta obvio cu despues di casi 7 anja di gabinete Mike Eman 1 y 2 cu e maneho di Mike Eman a fracasa y awe tur hende por wak y sinti e resultado den nan cartera. Comerciantenan no por mas, nos pueblo no por mas y e ta obvio cu e gobierno aki a fracasa y a crea un crisis economico cu tin efectonan serio pa nos pais. Algun siman atras mi a haci un recorido den Caya Betico Croes pa wak e situacion cu a wordo crea pa e gobierno di Mike Eman. Un situacion hopi tristo caminda tin 30 tienda a sera nan portanan y pa fin di e luna aki 4 mas lo sera nan portanan cu lo yega na un total di 34 tienda sera den Caya Betico Croes. Tur e comericiantenan cu nos a combersa cu nan a bisa cu e proyecto di renobacion di Caya a dura demasiado largo, e tram no a duna NINGUN resultado y mas bien e causa cu nan a perde benta y e parkeermeters ta loke a caba di mata nan den Caya. Envez cu gobierno ta accepta e reconoce cu nan a faya y cu tin problema pa tiendanan den Caya por sobrevivi ta culpa comerciantenan cu nan no ta inova y nan no ta inverti. Gobierno kier bisa pueblo cu tiendanan manera Istore den Caya no ta algo innovativo. Un tienda manera Aruba Aloe no ta algo nobo pa Caya segun gobierno. E problema ta cu e tram a perhudica tur comerciante y parkeermeters a haci e situacion peor di loke e tawata. Comerciantenan ta sclama y ta pidi cambio, ta pidi un solucion. Gobierno mester habri Caya Betico Croes bek pa trafico y haci algo cu parkeermeters. Sea ta elimina esakinan of ta cuminsa duna free parking algun ora pa dia. E situacion aki NO por keda asina.

Gobierno ta prefera di keda sin tuma accion y laga tur tienda sera nan portanan. Segun gobierno desaroyonan den a area den Palm Beach a afecta Caya Betico Croes. E weekend aki mi mes a bai haci algun compras den Palm Beach Plaza y e situacion eynan NO ta diferente cu Caya. Na Palm Beach Plaza e situacion ta lo siguente: Piso 3 100% bashi, Piso 2 50% ( danki cinema ), Ground 20% bashi. Na momento cu Caya Betico Croes ta den crisis, Palm Beach Plaza ta den mesun situacion no por bisa bisa cu e situacion ta bon pasobra ningun teinda ta bende! E situacion economico cu Mike Eman a crea na Aruba a causa e disaster cu tin actualmente. Un situacion serio, un situacion di deterorio di un pais. Rode Kruis a declara cu e pobreza na Aruba ta alarmante. Camara di comercio tambe a trece dilanti cu na Aruba 75 tienda a sera nan portanan pa motibonan economico. Ora un gobierno no kier accepta y realiza e danjo cu nan a causa na e pais ta pasobra nan a bira ignorante, arrogante y terco. Si tur indicador ta bisa cu e situacion ta malo y abo como gobierno ta keda insisti lo contrario nos pais ta den problema serio. Mester bin un cambio di gobierno, un cambio di direccion y un cambio cu lo haci Aruba bek e dushi pais cu semper nos a conoce. Un pais cu tin progreso y un pais caminda tur hende por prospera. No loke e gobierno corrupto aki a haci cu nos pais!

Expresionnan haci den e articulo aki no necesariamente ta refleha opinion di ArenaPoliti.co