Recientemente SKOA a gana un caso den corte contra mayornan pa cu pago di schoolgeld. Cu esaki SKOA un biaha mas ta libera Gobierno di su responsabilidad y ta prefera di pone mayornan paga mas placa. Tur esaki mientras cu Gobierno ta esun cu mester carga cu e gastonan aki pero SKOA no tin e curashi pa pone presion riba gobierno. 

MEP ta condena tambe e actitud di minister Michelle Hooijboer-Winklaar cu a perhudica TUR nos muchanan di scolnan SKOA. Minister Hooijboer a core pa su responsabilidad di duna SKOA mas fondo, pero a scoge pa castiga nos muchanan cu henter un aña no por a tene actividad. E minister kier culpa mayornan, pero e realidad ta cu e aumento di e schoolgeld di SKOA tabata debi cu e minister no kier a duna SKOA placa scondiendo tras di e hecho cu SKOA no a entrega cuenta financiero anual. Pero e mesun minister ta pone miyones disponible pa Rietveld Academie SIN cu Rietveld mester duna cuenta financiero anual. Minister Michelle Hooijboer a demostra cu e no tin curason pa nos muchanan di scolnan Catolico y e muchanan ni nan mayornan lo lubida con minister Michelle Hooijboer-Winklaar a castiga nan un aña largo. 

Tin placa pa minister Michelle Hooijboer-Winklaar pa tur sorto di cos. E minister aki ta bon den haci bunita pero el a demostra un biaha tras di otro cu e no tin curason pa nos muchanan ni pa enseñansa en general. E minister aki ta actua como dictador riba su mes, y ta prefera usa tur placa na su mesun propaganda, cu na enseñansa. Minister Michelle Hooijboer Winklaar ta un berguensa como minister.