E gobierno aki a demostra incapaz pa guia nos pais na progreso. Un sin fin di decisionan robez y prioridadnan robez a conduci cu awe nos pais ta den un chaos. Un pais cu un debe di mas cu 4 biyon florin, un pais sin crecemento economico, un pais caminda e consumidor no tin confianza den finanzas publico y economia. E problemanan cu e gobierno aki a causa a yega den tur skina. No solamente e pueboo a sufri sino comerciantenan tambe a sufri. Caya Betico Croes a wordo mata pa e gobierno aki. 

Tur e problemanan cu Caya Betico Croes ta aden actualmente a cuminsa for di momento cu e proyecto di tram a cuminsa. Un proyecto di renobacion cu lo mester a dura maximo 2 anja a dura 5 anja. E contratista cu a gana e bid NO por a caba cu e proyecto y finalmente ta DOW a bin purba finalisa e proyecto aki. Desde un principio por a mira cu e tramnan NO lo duna resultado. A usa fondonan cu tawata disponibel a e proyecto di Mavo, Havo, VWO na Noord pa cumpra 4 tram y pone e infrastructura. E proyecto di tram cu ta ensera 4 tram y e rails y infrastructura a costa nos pueblo 32 miyon sin cu NINGUN dia e la duna un resultado. Comerciantenan tur ta bisa cu NUNCA e tram mester a bn y cu e tram a traha contraproductivo. Envez cu a trece cliente pa nan, nan a mira cada anja menos y menos cliente y menos benta.

Pa completa e asunto gobierno di AVP a introduci Aruparking cual tawata otro medida riba lomba di pueblo. Nan a cobra pueblo 2 florin pa ora pa parkeer den Caya y tambe cobra empeladonan cu ta labora den Caya 900 florin pa anja, Mi a bisa cu Aruparking lo bai caba y mata Caya y ta esaki ta loke a sosode. Awe nos ta haya rason y promer minister Mike Eman mes ta confirma esaki.

Nos a bishita Caya Betico Croes  y nos a trece e imagenan pa pueblo mes por wak con e situacion den Caya ta. Un situacion hopi penoso caminda tin mas tienda sera cu tin tienda habri den Caya. Durante nos bishita nos a constata cu tin 42 tienda a sera nan portanan. E situacion den Caya no a bira mihor sino a empeora.

Remarcabel ta e hecho cu promer minister Mike Eman y henter su gobierno NO a tuma nigun accion pa yuda Caya Betico Croes te cu ayera. Mike Eman a prefera di laga 42 tienda sera nan portanan, laga 120 mama y tata di famia perde trabou promer cu nan actua, Mike Eman a prefera di sali na beneficio di su gobierno envez di na biniestar general y sali na defensa di mama y tatanan di famia. Awor cu Otmar Oduber a entrega su retiro, Mike Eman kier actua. Otmar Oduber a bisa cu e la retira di AVP pasobra e la bisa cu AVP a usa e poder cu pueblo a duna nan pa haci y deshaci. Awor a para bira cu Mike Eman ta culpa Otmar Oduber y na su turno esaki ta culpa Benny Sevinger. Hecho ta cu esnan responsabel pa e deterorio di Caya ta Mike Eman, Benny Sevinger, Otmar Oduber y henter e gobierno di AVP. Nan vision pa Caya a fracasa, NO a duna resultado y conduci na un Caya Betico Croes bandona.

Awor Mike Eman kier bin hunga heroe na momento cu e la flexibilisa e orarionan di Aruparking siendo cu e ta mes of mas culpable cu Otmar Oduber! Mi a presenta solucionan pa Caya pa yuda alivia e situacion y awor porfin gobierno a cuminsa tuma accion!

Expresionnan haci den e articulo aki no necesariamente ta refleha opinion di ArenaPoliti.co