Durante e reunion di dia 3 di November 2016 e Comite di Maneho Monetario (CMM) di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11 porciento y e “advance rate” na 1 porciento, despues di a evalua e datonan economico y monetario mas recien. A considera e siguiente informacion y analisis den e proceso pa yega na e decision aki. 

Reservanan internacional 
E reservanan internacional di divisa (incluyendo diferencianan den revaluacion di oro y di reservanan internacional) y e reservanan oficial a mantene nivelnan adecua na fin di September 2016. Ambos a registra aumentonan di, respectivamente, Afl. 331,3 miyon (+20,6 porciento) y Afl. 277,7 miyon (+18,8 porciento), compara cu December 2015. Consecuentemente, e reservanan internacional a yega Afl. 1.942,2 miyon na fin di September 2016.

Desaroyonan den credito 
E total di credito di e banconan comercial a mustra un aumento (+1,9 porciento) na final di September 2016 compara cu December 2015. Esaki ta atribui principalmente na e participacion di e banconan comercial den e emision di bono di gobierno. Credito na empresa y na consumidor a baha cu 0,6 porciento y 3,2 porciento, respectivamente, mientras cu fiansa pa construccion di cas a aumenta cu 3,9 porciento.

Inflacion
Na September 2016 a registra deflacion den ambos e tasa di inflacion compara cu e aña anterior (-0,7 porciento) y e promedio anual di inflacion (-1,0 porciento). E caida den inflacion ta principalmente causa pa un bahada den e tarifa di coriente na Januari 2016. E promedio di inflacion ora exclui e componentenan di cuminda y energia a subi na 0,6 porciento, primordialmente reflehando un aumento den e componente di vivienda di e Indici di Prijs di Consumo.

Turismo
Durante e prome nuebe lunanan di 2016, indicadornan di turismo a manifesta señalnan mixto, como cu a registra un subida den e cantidad di turistanan crucero (+14,2 porciento), mientras cu a nota caidanan den e cantidad di anochinan permaneci na Aruba (-1,2 porciento), ingresonan turistico registra na banconan comercial (-2,7 porciento) y e cantidad di bishitantenan (-4,2 porciento), compara cu e periodo corespondiente na 2015.

Placa den circulacion
Na September 2016 e cantidad di placa den circulacion a baha cu Afl. 130,3 miyon te na Afl. 4.044,7 miyon, compara cu e luna anterior. Esaki a resulta for di caidanan den tanto e activo domestico neto (-Afl. 47,6 miyon) como e reserva di divisa neto (-Afl. 82,7 miyon). Mientras cu e caida den e activo domestico neto a resulta door di un bahada den tanto credito domestico (-Afl. 14,5 miyon) como transaccionnan no relata na credito (-Afl. 33,1 miyon), e caida den e reserva di divisa neto di e sector bancario ta debi na e benta neto di divisa di Afl. 242,4 miyon na publico, primordialmente relata na pagonan neto pa e importacion di bienes y transferencia neto for di cuentanan den exterior di companianan local, cual parcialmente a wordo mitiga pa compra di divisa di Afl. 159,7 miyon for di publico, principalmente asocia cu turismo.

Sector gubernamental
Na September 2016 entrada di gobierno a baha cu Afl. 8,6 miyon te na Afl. 74,7 miyon, compara cu e mesun luna di e aña anterior. E ultimo ta debi na un caida den impuesto di Afl. 12,4 miyon, cual a wordo parcialmente mitiga pa un subida di Afl. 3,7 miyon den entrada no-relata na impuesto. Mientras cu e cambio den entrada for di impuesto riba importacion a keda mescos, impuesto riba ganashi a cai (-Afl. 2,9 miyon), y a nota un aumento leve den entrada for di impuesto riba benta di negoshi (BBO) (+Afl. 0,4 miyon), compara cu e mesun luna di e aña anterior.

Mercado financiero
Na September 2016 a nota caidanan tanto den e promedio di interes riba depositonan nobo (-0,1 punto di porcentahe te na 1,5 porciento) como den e promedio di interes riba prestamo nobo (-0,3 punto di porcentahe te na 7,3 porciento), compara cu e luna anterior. Consecuentemente, e margen di e tasa di interes a baha cu 0,1 punto di porcentahe te na 5,8 porciento.

Advance rate
E determinantenan di e “advance rate” di BCA a keda stabil. E margen entre e “advance rate” di BCA y e “Federal Funds rate” tabata 0,62 punto di porcentahe na September 2016. Consecuentemente, no tabata tin razon pa cambia e “advance rate” di BCA. 

Banco Central di Aruba 
28 di November 2016 

Expresionnan haci den e articulo aki no necesariamente ta refleha opinion di ArenaPoliti.co