Evelyn Wever-Croes tocante tantisimo amputacion di pia. 
MEP tin e solucion ! 

STA CRUZ - Lider di MEP Evelyn Wever-Croes a duna di conose cu e cantidad di amputacion di pia cu ta tuma lugar na Aruba ta haltisimo. "Berdad nos tin problema serio cu diabetes na Aruba, pero nos cuido pa pacientnan cu herida na pia tambe ta laga di desea. Aki mi NO ta referi na wonden polie, pasobra nos wonden polie na Hospital ta un di e mihornan den region. 

Aki mi ta referi na e hecho cu ya pa mas di 4 aña nos no tin un hyperbaric tank den uso na Aruba. Cu e tanki aki por duna tratamento na herida na pia y asina evita amputacion. 
Ademas cu por trata otro malesanan y por mehora calidad di bida di pacientnan cu cancer. 
E tanki aki ta un necesidad pa por atende turistanan cu haya accidente durante buseo y tanten cu nos no tin'e, Aruba ta core un riesgo grandi si un turista haya accidente y no por wordo trata. E siman aki nos a haya presentacion di e Hyperbaric Chamber Foundation den Parlamento, cu a informa nos cu ya pa dos aña caba nan tin un tanki hyperbarico na Aruba pero cu Gobierno y AZV ta NENGA di hasi uso di dje. 

AZV ta prefera di manda pacientnan den exterior pa tratamento cu ta costa mas di 1 miyon florin pa aña. E fundacion a hasta ofrese Hospital pa cumpra e tanki pa 180 mil dollar, pero ni asina ningun hende a mustra interes. 

Mi ta puntra mi mes, kiko gobierno ta warda? Con gobierno por sinta man crusa, sabiendo cu tin un solucion na Aruba cu por scapa hopi pia di wordo amputa. Y riba dje, un solucion cu lo evita costo halto di AZV!

MEP tin e solucion
Ami no por imaginami cu mientras cu nos por evita cu e 3 of 4 pianan lo wordo amputa otro siman, nos no ta hasi nada. Pesey mi ta exigi di gobierno y di AZV cu nan actua awor y asina evita cu mas pia ta wordo amputa inecesariamente. Pone e hyperbaric tank cu tin na Aruba den uso imediatamente y pensa riba con pa amplia e facilidadnan den futuro. Den esaki e planes di hospital pa bin cu un hyperbaric chamber den futuro por wordo ehecuta. Pero pa awor nos mester di un tanki urgentemente. Una bes cu MEP ta den gobierno, esaki lo haya prioridad!
Pasobra nos hendenan merese mihor, y nos diabeticonan merese un mihor cuido di salud ora ta traha herida na pia. Mi lo no descansa te ora esaki bira un realidad" Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co