Recientemente Fraccion di MEP a tuma nota di un comunicado di prensa cu e compania TERA GROUP a manda den nomber di minister Michelle Hooijboer dia 15 di januari ultimo, y a base di esey e minister a hasi algun pregunta na e minister. 

1.      Minister por confirma si ta TERA GROUP ta e compania de mercadeo cu ta encarga cu skibi articulonan pa Minister?
2.      Minister por suminstra Parlamento copia di e contract of contractnan cu Minister tin cu TERA GROUP?
3.      Minister por informa Parlamento cuanto placa ministerio di ensenjansa a paga na TERA GROUP pa trabounan ehecuta pa minister Hooijboer-Winklaar mes, den anja 2010, 2011, 2012, 2013 y 2014?
4.      Minister por duna un splicacion pa ki tipo di servicio e sumanan aki a wordo paga?

E comunicado di prensa tabata den ‘word’ y tabata tin tur e ‘track changes’ bisto pa un y tur. Di esaki por a conclui cu e comunicadonan a wordo traha pa un tal “Diana”, y cu un tal “Patrick” ta hasi hopi cambio den e comunicadonan. Entre nan dos, nan ta aplica un lenguahe hopi negativo, yena cu frustracion, y mas lamentable, den cual ta ataca oponentenan politico na forma sushi. Tur esaki ta wordo paga cu placa di pueblo. 

Na opinion di Fraccion di MEP hamas un gobernante por usa fondo publico pa desacredita y ataca oponentenan politico na forma sushi, manera e compania aki ta hasi pa minister. Mas aun, Fraccion di MEP ta di opinion cu esaki ta abuso di fondo publico, un acto castigable. Sigur den e temponan financieramente dificil, den cual ta ranca placa cu por yuda esnan den pobresa, en bes di paga compania di mercadeo pa hasi politica sushi.

5.      Prome cu tuma accion riba esaki, y dunando minister e oportunidad pa duna su banda di medaya, Fraccion di MEP kier haya minister su reaccion riba e opinion aki di Fraccion di MEP.

Fraccion di MEP a urgi minister pa contesta e preguntanan aki por escrito cu urgencia. A base di e contestanan Fraccion di MEP lo evalua pasonan adicional cu mester wordo tuma.

Expresionnan haci den e articulo aki no necesariamente ta refleha opinion di ArenaPoliti.co