No kabe duda cu e preucupacion mas grandi cu ta biba den pueblo di Aruba ta e aumento feroz di criminalidad riba nos Isla. Nos poblacion no ta sinti nan mes sigur mas ni den nan propio cas. No kabe duda cu esaki ta consecuencia di maneho di un gobierno hopi fatal cu a faya riba varios tereno. Riba nos isla tin un porcentahe enorme di hende illegal ta biba ….riba nos isla tin un porcentahe di mucha hoben cu no ta logra hanja un trabow y riba nos isla salario minimo simpelmente no ta jega.

Awo e motibonan aki no ta justifica pa hende bai den mal caminda pero realidad ta hopi otro y esaki ta contribui debidamente na e aumento di criminalidad enorme den nos sociedad. Lamentablemente gobierno Eman (AVP) y nan ministro Dowers a faya barbaramente den esaki y mester agrega acerca ta cu Parlamento NO a duna un contribuiccion serio pa soluciona e problematica aki.

PPA tabata e prome partido apesar di ta pafor di parlamento cu en vez di presenta fiesta…esta actividadnan cu cos pa bebe y come….cu a presenta un MASTERPLAN PA FRENE AUMENTO DI CRIMINALIDAD riba nos Isla. Nos ta desea di accentua algun punto for di den nos Masterplan pa eleva siguridad dentro di e Programa di PPA cu ta desea di hiba Aruba …..pa e PROXIMO NIVEL !!

MASTERPLAN PA SIGURIDAD (2017 -2012):

E structura di Cuerpo di Polis ta basa riba un reparticion di cuatro Warda di Polis cu ta situa na Noord, Oranjestad, Sta Cruz y San Nicolas. Pa loke ta trata esun di San Nicolas PPA ta presenta un maneho pa crea/construi un warda di polis cu hierarchicamente lo keda cay bao di San Nicolas pero cu lo tin e personal y material pa funciona den e barionan di Sabana Basora, Pos Chikito y Spaans Lagoen….e warda lo ta situa na Sabana Basora. Na mes momento PPA lo crea un Cuerpo Boluntario Arubano cual su kazerne etc tambe lo ta situi na Sabana Basora.

PPA lo pone/construe un strandpolitie post na Seroe Colorado combina cu un Toren di Vigilancia esaki cu e meta pa combini e drentamente di illegal na Seroe Colorado esta baby y rodgersbeach den future.

PPA ta di opinion cu e proximo warda di polis pa Oranjestad y Dakota lo mester bin na e sitio mas strategico cu ta x JFK scol pa varios motibo. E posibilidad pa polis sali den tur direccion mas efficiente, lo evita pa den futuro nos ‘ontvanger der belastingen’ bira un sitio di atraco…., minimalisa maldad na e desaroyo dilanti x Talk of the Town y e miho sitio pa coordina e trabao di polis durante eventonan di Carnaval na Oranjestad.

PPA lo moderniza e edificio di polis na San Nicolas algo cu AVP a priminti ocho anja pasa pero NO a cumpli !!

PPA su maneho pa interesa hoben pa bira polis lo ta uno mas dinamico …no solamente na Aruba pero tambe bao di e arubianonan biba na Hulanda !

PPA lo pone TUR post di barrio bek den servicio cu suficiente personal y material y un structura debido pa garantisa nan funcionamento.

PPAlo garantisa cu lo tin mucho mas ‘blauw’ riba caya pa mehora funcionamento di cuerpo di polis y eleva siguridad riba nos isla.

Pa tal motibo ta mas cu justifica pa pueblo di Aruba scoge pa e lista di combinacion di PPA/UPP …nos lo garantisa ‘good governance’ y un crecemento di nos pais balansa…

PPA lo duna sosten na ‘neighbourhood watch’ den nos barionan.

PPA lo crea curso pa prepara esnan cu lo traha pa companianan di siguridad den futuro esaki lo ta na bienestar di tur partner den e proceso….e trahado den siguridad mes…..e compania di siguridad y e compania cu ta ricibi e servicio.

BRANDWEER:

Funcionamento di nos brandweer no a tene cuenta cu e crecemento di nos pais !! Cu otro palabra gobierno di pais Aruba No a inverti suficiente den nos brandweer pa mantene na e nivel cu e mester ta na e momento aki. Aruba tin 2 post di Brandweer pa henter nos pueblo esta esun na Tanki Flip y un na San Nicolas. Esun na aeropuerto ta strictamente pa Aruba cumpli cu e Tratado Internacional di Aviacion. PPA ta di opinion cu mirando e crecemento substancial di nos pueblo ta justifica pa Brandweer hana un edificio/post completo na Balashi ! Henter Brandweer lo mester ricibi mas atencion di parti di gobierno. Lo mester bin mas inversion y lo mester tin un Cuerpo cu staf y personal y tur material moderno. Tambe PPA su maneho lo crea un Brandweer Voluntario Arubano pa duna nos Brandweer e sosten necesario. Na kada edificio grandi na Aruba lo mester tin personal di e compania ey cu a sigui e curso di ta un Brandweer voluntario.

Tur esaki y mucho mas ta forma parti di maneho di PPA pa eleva Aruba pa e Proximo Nivel !


Aruba, 3 di September 2017
Secretario General di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co