Na ocacion di Dia di Himno y Bandera 2015, den nomber di Lider di MEP den calidad di Secretario General di Partido MEP hunto cu collega di partido Rudy Richardson, nos ta presenta un ofrenda floral na memoria di Betico Croes riba Plaza Status Aparte na Santa Cruz, dedicando e palabranan aki.

Nos himno, nos bandera, nos escudo y nos moneda, ta simbolonan di nos identidad. Nan ta locual ta uni nos como Pais. Nan color, nan simbolonan ta representa e idealnan di nos Pais y ta refleha e historia y e orguyo di su cuidadanonan. Tur e simbolonan aki ta digno di nos respet mas profundo ya cu nan ta comparabel cu e alma di Pueblo aki.

Historia a siña nos cu ta hopi esfuerzo Betico Croes a haci pa awe nos tin nos Bandera. Hasta su cas ela hipoteca pa por a brinda Aruba su Bandera como simbolo di union. Cuanto di nos lo ta willing pa haci un sacrificio asina grandi awe? Pesey pa esnan cu no ta compronde pakiko awe Dia di Himno y Bandera nos mester ta para aki, mester realisa cu sin e esfuerso di Betico nos no tabata tin un Bandera awe. Pesey e merece e honor aki awe y te eternidad.

A mishi cu e color di e bandera y cu esaki ta mishi e alma di e Pueblo aki. Nos tur por a sigi e discucionnan cu tin, e ta dividi un Pais. Si solamente a envolvi tur hende, nos sigur lo por a sali afor. Pero e mayoria no a scohe pa esaki, nan a scohe pa e divicion.

Dividi un Pais y bo por haci cune kiko bo kier. Nos Pais ta pasando den hopi cos y tur hende ta puntra dicon niun hende no ta haci nada.E contesta ta simpel, e divicion ta locual ta trece cu no tin union pa para hunto pa por logra bay dilanti.

Nos mester traha riba e union di nos Pueblo. Door di desunion nos a habri caminda pa gobernante di awe abusa sin fin di nos Pueblo.Nos mester rechasa manipulacion, engaño y falta di respet, nos mester uni.Falta di respet pa nos simbolo nan di union y libertad, sigur mester wordo rechasa.Betico a yega di mustra nos e caminda y laga atras ehempel con pa ta uni como un Pueblo. Ta keda na cada un di nos, pa mustra cu nos actuacion cu nos ta determina pa sigi e ehempel aki pa por logra e union y forza cu nos mester pa por libra nos Pais di tur abuso.

Ban celebra nos Dia di Himno y Bandera awe haciendo e promesa pa uni forza pa nos libera nos mes di tur cu kier domina e libertad cu cual nos Bandera ta bula awe y libera nos mes di tur cu kier caba cu e orguyo cu nos ta sinti como Arubiano cantando nos Himno Aruba Dushi Tera.

18 maart 2015

Expresionnan haci den e articulo aki no necesariamente ta refleha opinion di ArenaPoliti.co