Diaranson ultimo e pueblo Arubano a celebra su Dia di Himno y Bandera den un forma ehemplar, caminda tur actividad social y cultural riba e dia aki a ser bishita den forma masal y cual ta muestra cu e pueblo aki ta respeta y stima su dia. Alavez nos a por a scucha varios ministro y parlamentario cu ta sostene gobierno duna declaracionnan elocuente caminda nan tabata hopi contento con e dia aki a bay. Siguramente di parti di MEP cu ta e partido cu a inicia cu e celebracion aki 29 aña pasa tambe a mustra nan aprecio y respet honrando nos simbolonan di union y libertad, nos himno y bandera.

Sinembargo lo ta bon pa bay un rato den pasado pa recorda pueblo con cierto di e parlamentarionan di AVP cu awe ta hopi satisfecho con e dia di 18 di maart aki a bay, cu na 2008 nan tabata e autornan principal cu tabata den prome fila di un grupo di manifestante pa haci desorden durante e acto protocolar cu Gabinete Oduber a organisa riba Plaza Libertador Betico Croes. Nan intencion tabata pa - den nan paña di rouw y riba musica di morto – desfila y haci bochincha dilanti tur e mandatarionan presente, incluyendo invitadonan for di exterior y asina pone henter cara di nos pais na berguensa. Riba e fotonan adhunto por mira algun di e parlamentarionan aki.

Hecho ta cu awe nos pais ta casi den bancarota y caminda corupcion y malgobernacion ta na orden di dia na man di Gabinete Eman, sinembargo ningun parlamentario ni miembro di MEP lo hinca den nan cabez pa deshonra e dia di Himno y Bandera door di maluza e celebracion aki pa instiga pueblo contra e gobierno di AVP. Asina pues pueblo mes ta testigo e diferencia cu ta existi entre un partido di instigacion y un partido di union di e pueblo Arubano. Laga e forma ehemplar aki di dirigentenan di MEP ta un ehempel pa nunca mas sosode locual cu a sosode dia 18 di maart 2008, cual tabata un pagina scur den historia di celebracion di nos Dia di Himno y Bandera.

Expresionnan haci den e articulo aki no necesariamente ta refleha opinion di ArenaPoliti.co