Mester siña di experiencia di otro paisnan! 

E reforma di nos sistema di belasting mester duna resultado concreto pa tur sector di nos comunidad. Contrario na pasado y consehonan di 'expertonan cu bista limita', e accionnan di gobierno mester sirbi mas cu gobierno so. Den pasado e introduccion di e BBO a sirbi solamente gobierno. Gobierno di MEP a haya hopi mas placa door di e BBO, pero pueblo y comercio no a wak niun beneficio. Ni directo ni indirecto. E reforma di belasting cu gobierno a anuncia siman pasa no por tin e mes un efecto limita. Esaki ta loke e fraccion di AVP a fiha como exigencia na e proposicionnan. Tambe por siña di e introduccion di cambionan den sistema di belasting den otro paisnan. Hopi biaha den otro paisnan e reformanan no a duna e resultado desea pa motibo di falta di maneho di gobierno.

EFECTONAN DESEA DI REFORMA FISCAL
E resultadonan cu fraccion di AVP ta spera di e reforma fiscal ta manera a pone entre otro den programanan di partido for di 2009. Pa Pueblo AVP ta spera un sistema di belasting cu ta mas facil pa cumpli cun'e y cu ta elimina cobransanan añanan despues. Ora un hende no cumpli cu su responsabilidad como ciudadano so e combransa mester bin despues. Tambe ta spera cu e peso di belasting no bira mas halto. Si ta posibel menos. Door di reduci belastingnan directo manera belasting riba salario. Por logra esaki sin perde entrada pa gobierno, door di busca mas e entrada den belasting indirecto cu no ta trahadornan so ta paga, pero tur hende cu bin of cu ta biba na Aruba. Awor aki e beladting riba salario (loonbelasting) ta un di e fuentenan di entrada mas importante di gobierno.

COMERCIO Y INDUSTRIA
Pa comercio y industria (sector priva) AVP ta spera tambe un sistema cu ta haci'e mas facil pa doñonan di empresa paga nan belasting na tempo, den un sistema automatisa cu ta elimina e administracion exajera. Tambe ta spera cu no ta aumenta e peso di belasting. Di e forma aki gobierno lo haya e belasting cu comercio mester paga mas lihe. Na mes momento un sistema mas transparente y cu menos peso pa sector priva lo contribui na crea mas cupo di trabou den sector priva.

GOBIERNO
Pa gobierno e resultado mester ta e eliminacion di belasting atrasa manera a sosode for di 2001. E belasting atrasa aki a aumenta te yega mas o menos 2.2 biyon florin. Cu e placa aki of hasta mitar, didje, lo por elimina e deficit riba presupuesto y haci'e innecesario pa fia placa pa presupuesto. Solamente lo mester fia pa haci inversion mescos cu sector priva. Un resultado positivo pa gobierno mester ta tambe cu e necesidad pa mas hende den servicio di gobierno ta baha y e servicio automatisa di belasting ta percura pa miho servicio na ciudadano y comercio.
Pa Fraccion di AVP esakinan ta algun di e efectonan positivo cu ta spera di e reforma. Esun mas importante ta cu e sistema di belasting nobo hunto cu accionnan specifico di gobierno, lo conduci na mas inversion di sector priva y den sectornan nobo di economia y creasion di cuponan di trabou nobo. Di e forma aki ta logra e meta di diversifica nos economia, mientras ta sigui inverti hopi den mehora e calidad di turismo, cu lo keda e pilar economico principal pa awor. Pa AVP ta asina ta usa tur instrumento fiscal y desicionnan politico pa sigura crecemento economico y mehora posicion social di henter comunidad.

Expresionnan haci den e articulo aki no necesariamente ta refleha opinion di ArenaPoliti.co