Gabinete ME II: Ta bay instala panelnan solar na 21 scol y 9 edificio di Gobierno pa un total di 3.8 di megawatt
ORANJESTAD – 21 di e 80 scolnan cu tin actualmente na Aruba ta cumpli cu e condicionnan necesario pa por haya panelnan solar riba nan dak. Esaki a wordo anuncia door di expertonan recientemente den un conferencia di prensa cu a conta cu presencia di Prome Minister Mike Eman y Minister Mike de Meza. Prome Minister di Aruba a pone como un di e metanan di su Gobierno pa instala panelnan solar riba dak di tur scol na Aruba. E 20 scolnan hunto cu algun edificio di Gobierno lo por produci 3.8 megawatt di coriente sostenibel.
Esaki ta apenas e inicio, e mandatario a duna di conoce durante un conferencia riba e tema aki, cu a conta cu presencia di e comision di expertonan di TNO, WEB y ELMAR cu a haci e investigacionnan necesario.
Aunke cu e tabata un pensamento cu e mandatario tabatin for di inicio di su gobernacion, tabata e aña’ki cu un comision a keda instala pa haci e investigacionnan necesario. “Esaki,” e mandatario a bisa tur esnan presente, “ta un momento importante den realisacion di nos deseonan di ta totalmente sostenibel na 2020.” A wordo splica na esnan presente di e Comision Strategico di Conseho cu a keda instala algun luna atras cu a studia e diferente camindanan cu mester cana pa yega e meta cu kier logra. A base di esaki a traha un agenda den cual realisacion di e metanan por ta mas visibel y realistico pa e proximo añanan. Un di e proyectonan aki tabata instala panelnan solar riba mas tanto scol posibel na Aruba. “Pa uza e espacio aki optimalmente cu panelnan solar y crea un conexion cu e siguiente generacion di suministro di coriente sostenibel.”
E ta un proyecto cu ta wordo realisa hunto Carbon War Room, Rocky Mountain Institute, WEB, ELMAR y TNO.
“E estudio a keda cla y e cantidad di scolnan na unda por instala panelnan solar no ta mes hopi cu mi lo desea,” e mandatario a bisa prome cu e expertonan a splica con e proceso tabata pa dicidi cua ta e scolnan cu ta bini na remarca.
ELMAR y WEB ta representa den e comision den persona di Elton Lampe. El a trece dilanti cu na momento cu a cuminsa cu e proyecto aki a pone como meta pa instala un sistema solar PVC di 100 KW. E motibo ta cu e grandura di un sistema asina ta permiti mas flexibilidad pa acomoda e energia solar den e grid di ELMAR. A cuminsa pa tuma un inventario di e areanan di daknan disponibel na scol, cu por carga e peso di e panelnan solar. “E ultimo aspecto aki a elimina un gran cantidad di dak, no debi na e calidad pero e tipo di daknan cu tin instala.” Despues a haci un evaluacion di e sistema di coriente manera cu e ta awor, pa mira si e por handle e poder di e coriente cu ta wordo manda pa e grid. Tambe a tene na cuenta e plannan di renobacion of construccion di scolnan cu tin pendiente. Na mesun momento a haci un evaluacion di edificionan di Gobierno.
E resultado di e estudio tabata cu di e 80 scolnan, 21 ta den capacidad pa instalacion di panelnan solar y tambe 9 edificio di Gobierno ta bon candidato pa hunto produci 3.8 megawatt di coriente. Si tur scol tabata adecuado pa panel solar, e lo tabatin un potencial di 10 megawatt.
Expresionnan haci den e articulo aki no necesariamente ta refleha opinion di ArenaPoliti.co