Diaranson 24 di juni huez a tuma su decision den e caso cu Lee Tofanelli (Aruba Music Festival) a lanta contra Pais Aruba relaciona cu e paro cu Minister Oduber a pone pa loke ta organizacion di Aruba Music Festival y pagonan di contractnan firma apenas un luna prome cu gobierno a cambia na 2009. E decision di corte tabata na fabor di Pais Aruba unda cu huez a rechaza e demanda di Lee Tofanelli.
E sentencia aki ta encera cu Pais Aruba no mester paga Lee Tofanelli mas di 6 miyon Florin cu e tabata demanda debi na un contract cu ex minister Edison Briesen a firma prome cu a baha como minister na 2009. Den e caso, e ex mandatario di MEP a declara na fabor di Tofanelli y contra Pais Aruba.
Ta asina cu un par di luna despues cu Minister Otmar Oduber a asumi e posicion di mandatario na 2009, pa ta ser exacto dia 22 di januari 2010, el a ricibi un carta di Centrale Accountant Dienst (CAD) cu ta bisa cu e acuerdo firma riba 1 di october 2008 cu Lee Tofanelli and Associates Inc. den nan opinion ta bay contra articulonan 25 y 31 di comptabiliteitsverordening. Esaki despues cu 3 rapport di CAD anteriormente a mustra riba e hecho aki. Den e carta di januari a bisa cu si Minister Oduber continua cu e contract aki e lo haci su mes culpabel mescos cu e minister anterior di violacion di e comptabiliteitsverordening.
Mirando e situacion aki y teniendo na cuenta bienestar di nos pais, Minister Oduber a indica na Lee Tofanelli cu Gobierno no lo continua cu Aruba Music Festival, cual acuerdo por cierto a wordo traha na october 2008 y a wordo firma te na september 11 2009 na bispo di eleccion.
Por lesa den e vonnis cu contrario na e conciertonan anterior di Aruba Music Festival cu tabata discuti anualmente e suma cu ATA lo sponsor, e ultimo contract pa e periodo di 2010 te cu 2013, es decir pa 4 aña largo, a pone preto riba blanco cu e presupuesto pa cada festival no lo por ta menos cu 850 mil Dollar, cu otro palabra un suma di riba 6 miyon Florin den 4 aña.
Loke ta hacie mas grave ainda ta e hecho cu ya caba na 2008 directiva di ATA a bisa Minister Briesen e tempo ey cu e suma di casi 1 miyon Dollar pa e Aruba Music Festival no tin base y no ta razonabel mirando cu e no tin un bon Return On Investment (ROI). Esey kiermen cu e suma inverti no ta hustificabel pa e cantidad di bishitantenan of aumento di bishitantenan dor di e evento. Mas ainda, ATA di su banda tabata haci inversionnan pa engrandece e nomber di Aruba Music Festival y atrae turistanan pa e evento aki.
Awe, despues di 5 aña Corte den Prome Instancia a duna un sentencia contra Lee Tofanelli cu Aruba Music Festival y Eddie Briesen, kende abiertamente a sostene Tofanelli den e caso contra Pais Aruba.

Expresionnan haci den e articulo aki no necesariamente ta refleha opinion di ArenaPoliti.co