Partido UPP ya caba den nos ultimo articulo a relata riba e “DILEMA DI MIKE E.”
E storia a dal un buelta di 180 grado ora cu Mike E. y su hendenan a dicidi di bay Hulanda pa papia cu minister Koenders riba un posibel reapertura di e refineria.
E meta di e biahe di Mike E. pa Hulanda no tabatin nada di haber cu e bienestar di Pueblo di Aruba, sino mas bien cu asuntonan cu ta toca Hulanda.
UPP ta considera e topico di reapertura como un “smoesje” of “smokescreen” pa asina bolbe tapa loke realmente a wordo discuti. En todo caso Mike E. su dilema principal ta, y lo keda Otmar O., y esaki nos por a comproba claramente e ultimo dianan aki na unda Otmar O. publicamente ta cuestiona maneho di su hefe Mike E.

Pero tin otro topiconan mas cu lo a wordo trata y cu ni gobierno Hulandes ni Mike E. lo ta dispuesto pa divulga na nos pueblo.
Asina nos por menciona cu bishita di Mike E. sigur tabatin di haber cu e ley di CAft cu a yega Parlamento.
Mike E. na Hulanda mester a purba na bolbe haya un “uitstel”, pa asina schuif e batata cayente mas dilanti.
Tambe tin e situacion di DIMAS, cu mester a wordo trata seguramente. No ta pornada cu nos por a ripara cu Benny S., encargado di e cartera di admision, tambe tabata na Hulanda. Seguramente lo tabatin un dunamento di cuenta y promesanan cu awor si lo bay ta mas “streng” den maneho di admision. Esaki nos por a mira caba na momento cu despues di 6 aña di un “generaal pardon” ta bay cuminsa aplica regla.

Mientras cu hopi hende ta grita cu de facto Hulanda lo a “roep” nan “op het matje”, nos di UPP ta wak un otro maniobra di parti di Mike E. pa hustamente na e momentonan aki a bay Hulanda pa regla algun cos.
Partido UPP ta kere cu e bishita mas bien tabatin di haber cu e candidatura di Hulanda pa un puesto no-permanente den e Conseho di Seguridad di Nacionnan Uni. Tabata un situacion na e momentonan ey di “cani mi, pa mi cani bo”. Na e momentonan aki Hulanda ta bezig ta lobby pisa pa por haya e puesto aki pa e periodo 2017-2018, y den e cuadro aki ora nos subi e website di netherlandsmission.org, nos por mira con Hulanda of Reino Hulandes ta presenta nan mes como ‘Your Partner for Peace, Justice and Development”.
Y si bo sigui busca, lo bo encontra un Hulanda cu ta gaba e trabou di Mike E. na Aruba y su presentacion internacional como un “abogado di desaroyo sostenibel”.
Na mes momento Hulanda ta presenta Reino Hulandes como un pais cu ta den nos mundo, esta esun Latino Americano y Caribense, y naturalmente esun den Europa Occidental. Pues casi nos por pensa - mirando cu otro aña na october lo mester bin eleccion pa reemplaza di un banda Venezuela y di otro banda Spaña y New Zealand - cu por medio di un lobby internacional, y usando Mike E. den e caso aki, Hulanda ta trata na logra su meta di haya e votonan necesario durante di e asamblea general na october otro aña.
Pues aki Mike E. ta fungiendo como un "Makelaar"!!!
Pues despues di su locura di welga di hamber, unda cu Gobierno Hulandes a wordo tilda pa “verkrachter”, y cu nan lo bay Nacionnan Uni pa denuncia esaki, Mike E. ta haya e oportunidad, cu aprobacion di Hulanda, pa viaha rond mundo, sea den nomber di Aruba of den nomber di Reino, p’e hiba su discursonan.
Nos no tin di lubida e conferencia na e isla di Samoa.
Pero tambe recientemente na Nacionnan Uni, ora cu Mike E. a bay papia di desaroyo di teritorionan chikito y di seguridad, unda cu el a bay tene su storia atrobe di desaroyo duradero y un pais “happy” unda cu desigualdadnan ta wordo elimina, y cu tur esaki ta contribui na seguridad. Despues nos por a mira un Mike E. como keynotespeaker na e Forum for the Americas na Toronto, unda e minister Hulandes di medio ambiente tambe tabata presente.

Riba e website, unda Hulanda ta promociona su mes, ta elogia Mike E. y ta anuncia cu hunto cu Hulanda nan ta prepara pa duna presentacion na e Cumbre na Paris di COP (Conference of the Parties to the United Nations Framework Convention on Climate Change), cu lo dura te cu 12 di december.
Aki claramente nos por mira cu Hulanda y Mike E. ta hungando cu otro, e prome pa wak con mas tanto e por saca probecho y mara nos na man cu pia, e otro pa wak con su nomber por wordo vindica, manera Hulanda mes ta pone, como e prome isla y pais na mundo cu ta 100% green.
Mientras cu Hulanda tambe tin su deber riba tereno ambiental cu loke nos conoce como e tratado di Kyoto, unda Reino ta comprometi pa baha e emision di carbon. Y dor cu na Hulanda esaki ta bay “traag”, ta hunga cu e aspecto aki den e parti Caribense di Reino, pa asina mustra cu Reino ta cumpliendo. Pero na ki costo, esey si no ta wordo bisa.
Y aki ta unda Mike E. tambe ta hungando su wega cu Hulanda, cooperando y complaciendo cu Hulanda, y di otro banda trata di wanta un metemento Hulandes mas leu cu ta posibel for di portanan di gobernacion.
UPP den pasado caba a bisa cu tanto gobierno di Aruba como esun di Hulanda ta hunga “kat en muis”, mientras ta tuma nos tur di haci.
Pero por lo pronto nos lo no mira Hulanda bay ta mas metiche, sino solamente por medio di un CAft y ta duna Mike E. e espacio pa e yega te 2017, y cu su salida lo ta uno di porta dilanti.
For di aña pasa UPP tabata tin e informacion cu Hulanda a spera cu na Aruba lo por a bin un frente pa por a interveni mas directo y duna oportunidad pa un otro gobierno, ya cu Mike E. a hunga un rol ekiboca cu Hulanda.
Pero na momento cu Hulanda a ripara cu no tin e seriedad aki, a scohe, manera Mike E. mes ta bisa, e caminda di dialogo y no di confrontacion. Y den e cuadro ey Hulanda a keda maniobra, ya cu Hulanda no tabata wak un otro solucion por lo pronto.
UPP ta preparando un carta pa varios organonan internacional pa denuncia e maniobranan Neo-Colonial di Hulanda. P’esey mes UPP ta kere, ohala nos lo por ta ekiboca, cu por lo pronto nos no por spera nada di Hulanda aki banda. Ta e Arubiano so por salba e Arubiano.
ARUBA Y ARUBIANONAN, QUO VADIS?


Den nomber di Union Patriotico Progresista – U.P.P.
Candelario A. S. D. Wever
Brazil, augustus 23, 2015

Expresionnan haci den e articulo aki no necesariamente ta refleha opinion di ArenaPoliti.co