Lider di PDR mes a mustra cu ta un mentira! 

E mentira cu MEP a usa pa purba lanta pueblo y en especial trahadornan di gobierno (=polis, trahadornan di hospital, maestronan di scol, duaneronan y otro departamentonan) ta cu den e ley cu a wordo aproba lo tin medida den dje. Esta cu trahadornan lo bay perde netamente e mentiranan cu bou gobierno di AVP nan a haya bek. Beneficionan manera indexering pa costo di bida. Apesar di cu AVP a mustra cu loke MEP ta bisa absolutamente no ta berdad, MEP a sigui circula e mentira aki den Pueblo y bou di sindicatonan. E presidente di sindicato di polis a hasta comete e eror di parti e mentira aki den un carta mal traha bou di su miembronan.

RETO
Durante di e reunion di Parlamento, Rene Herde di AVP a reta e miembronan di MEP pa mustra unda den e ley tin scirbi cu ta bay tin medida. Tur e miembronan di MEP a rabia y a cuminsa busca excusanan falso ta scapa nan cara. Alfin ta e lider di e partido PDR mes, cu tambe ta den oposicion, a bisa enfaticamente cu "no tin medida den e ley aki". E lider di PDR cu ta un abogado cu conoce ley bon, a papia berdad ora ela bisa cu den e ley no tin niun medida. Ora a kita e mentira aki cu MEP a usa for di nan, no a keda nan nada otro cu sigui cu nan plan di agresion,  violencia y destruccion, cu a sigui despues di e reunion. Esaki a mustra cu MEP ta sigui purba gaña pueblo enbez di presenta plan of ideanan pa yuda nos pais bay dilanti. Esaki ta demostra tambe e dicho di pueblo cu ta bisa: "Mentira ta core duru, pero semper berdad ta alcans'e."

Expresionnan haci den e articulo aki no necesariamente ta refleha opinion di ArenaPoliti.co