ORANJESTAD -- Parlamento diahuebs dia 27 augustus a demostra un dictadura bergonsoso na momento di a bira lomba pa pueblo. Parlamento e fecha ey a trapa y a destrui e honor y e dignidad di e cuidadano, cu e actitud di arogancia. Fraccion di MEP tin berguensa di ta forma parti di un Parlamento cu no tin derecho di yama su mes Parlamento mas. E parlamento a para bira un dictadura.

E iniciativa di sra. Lopez-Tromp y sr. Eman di bai drecha bentana y verf e edificio di Parlamento riba su mes ta ironico, pasobra tur ta window dressing y show. E destruccion real NO ta na edificio di Parlamento. E destruccion REAL ta na e honor y dignidad di nos pueblo. E destruccion REAL ta na nos autonomia. Pesey mes, despues cu sra. Lopez-Tromp y sr. Eman caba di verf e muraya di Parlamento, ta momento pa nan reflecciona con ta bai repara e danjo inmenso hasi na e honor y dignidad di nos pueblo, y na nos autonomia.

E gritonan di ta baas den nos mesun cas cu e antepasadonan di sr. Eman mes tabata grita, awe sr. Mike Eman a destrui. Pesey mes, hopi cuidadano ta comenta cu Parlamento di Aruba mester repara e danjo causa na e lucha di Aruba pa ta baas den nos mesun cas prome cu drecha e edificio di Parlamento mes. Pasobra tanto bal un edificio di parlamento bunita, si e esencia di democracia mes a wordo destrui. Si momento cu sindicatonan a pidi pa oido, nan a wordo nenga! Si momento cu pueblo a roga pa no regala nan autonomia, nan libertad, a scohe pa agredi nan cu klop. E presidente di parlamento a demostra cu e no tin respet pa e dignidad di nos pueblo, y pueblo a demostra a cambio cu e no tin respet pa e edificio di parlamento. Cual ta pisa mas?

Ta importante pa ni sra Lopez-Tromp, ni sr. Eman subestima e rabia y frustracion cu tin den pueblo, cu a condusi na e rosea cayente cu pueblo ta expresando. No subestima esaki, pa despues bo no bin yora atrobe.  Partido AVP a faya cu nos pueblo, y a traiciona nos autonomia. Repara e danjo EY prome cu hasi show y repara e danjo hasi na e edificio di parlamento, si acaso boso a resta siquiera un tiki honor y dignidad.

Expresionnan haci den e articulo aki no necesariamente ta refleha opinion di ArenaPoliti.co