AVP: un partido cu semper ta keda mira den pasado! 

Desde cu AVP a drenta gobernacion na 2009, constantemente nan ta keda mira den pasado, esta di locual gobierno di MEP a haci of laga di haci durante e periodo di 2001-2009. Ta bisto caba pa henter comunidad con na momento cu e gobierno di AVP kier implementa un of otro medida cruel contra pueblo, semper nan tin cu gaña y manipula bisando cu e medidanan aki ta ideanan cu tabata existi caba durante e 8 aña di gobernacion di MEP.

Pago pa recoge sushi
Asina diripiente nan a bin corda cu tin un MEP ta existi y a core colga na bachi di Gabinete Oduber ora cu nan di AVP kier a introduci e medida di recogemento di sushi bisando cu e idea di pago pa e servicio aki tabata existi caba durante gobernacion di MEP. Sinembargo nan no ta bisa pueblo si cu MEP nunca a ehecuta e idea aki, pero MEP semper a percura pa gobierno mes sigui duna e servicio aki gratuitamente, ya cu e introduccion di BBO na 2007 tabata genera suficiente entrada pa gobierno mes absorba e suma di pago pa recoge sushi aki. Pues durante 2001 te cu oktober 2009 cu MEP a bandona gobernacion (8 aña largo!), nunca a ser cobra pa recoge sushi, te ora cu esaki a bin na vigor na 2015 bao di Gabinete Mike Eman. Pues mester conclui cu ta AVP mes ta e tata spiritual di pago pa recoge sushi aki na Aruba.

Pago pa parkeer auto
Awor riba e asunto di parkeermeter, Minister Otmar Oduber diripiente tambe a corda cu tin un MEP ta existi y a cuminsa manipula cu informacion bisando cu e parkeermeternan tabata plania caba pa ser ehecuta durante Gabinete Oduber. Enberdad tabata asina cu un estudio riba e asunto di parkeermento a ser haci pa Arubus door di dos stagaire for di Hulanda. Esaki tabata na 2007, pero e idea aki nunca a ser concretisa ni ehecuta, ni na 2007, ni na 2008 y te cu oktober 2009 cu MEP a bay for di gobierno (3 aña largo!) nunca pueblo por a mira ni un solo parkeermeter den centro di ciudad. Awe na 2015 parkeermeternan a broei den henter centro di ciudad y un biaha mas esaki ta bao di gobierno di AVP, cu tambe a bira e tata spiritual di parkeermeter na Aruba. Y tur esaki pasobra Minister Oduber a corta drasticamente den subsidio pa Arubus y p’asina e placa por keda den caha di gobierno y cu nan por sigui malgasta na nan antoho.
Hecho ta cu desde cu partido MEP a funda Arubus na 1979, gobiernonan di MEP semper a keda subsidia e compania estatal aki tur aña, ya cu e mobilidad social di esnan mas vulnerable den comunidad mester keda wordo sosteni. Asina nos por mira cu te cu 2009 Arubus tabata haya di Gabinete Oduber un suma na subsidio di 6 miyon florin pa aña, pero un biaha mas tabata un gobierno di AVP cu a corta drasticamente den e subsidio di Arubus y awor ta na punto pa elimina e subsidio completamente (medida 16 riba e lista di 24 medidanan).

Oranjestad sangrando
Awe pueblo di Aruba ta sinta bon stanca cu miles di parkeermeter den centro di ciudad, un ciudad cu ta sangrando y caminda tur trahador, tur comerciante y tur automobilista ta sinti nan mes perhudica grandemente. Awe tur trahador cu ta gana un salario di 1600 florin pa luna mester paga 75 florin tur luna pa nan por parkeer nan auto y p’asina cumpli cu nan debernan laboral. Hecho ta cu ta un ministro burdugo so por haci algo asina contra e clase trahado.
Sinembargo locual partido MEP ta haya hopi remarcabel ta cu ora ta toca medidanan cruel contra pueblo, semper e gobernantenan di AVP ta recori na e 8 aña di gobernacion di MEP, ta gaña, ta manipula y ta trata di benta e aspectonan negativo aki den scochi di MEP. Di otro banda, ora cu ta trata di idea y proyectonan positivo cu tabata cla pa ser ehecuta, manera construccion di un school HAVO/VWO na Noord, e hotel di 5 strea Ritz Carlton, e Centro di Cardiologia na San Nicolas, e plantanan di awa (Reverse Osmosis) y di coriente (Recip) nunca e politiconan di AVP ta referi e ora ey na e periodo di 8 aña di gobernacion di MEP. Alcontrario, si nan mester a boycotia varios di e proyectonan menciona, nan a haci tur nan esfuerso pa ehecuta e boycott aki.
Asina pues nos por conclui cu e gobernantenan di AVP semper tin un actitud mezquino y ambivalente y cu ta pesey nan lo bay den historia como esnan cu no a traha na interes di pueblo, pero pa nan propio beneficio.

Expresionnan haci den e articulo aki no necesariamente ta refleha opinion di ArenaPoliti.co