ORANJESTAD - Gabinete Mike Eman a perde un gran persona den e erudita Piet Pronk, kende a cera su wowonan pa semper diadomingo anochi pa 11.33. Esaki a sosode den dr. Horacio Oduber Hospital den presencia di su señora Tine, su yiunan Annemarie y Yolanda. Presente durante henter dia y anochi tabata tambe Prome Minister di Aruba Mike Eman, su señora, miembronan di staf di Gabinete Mike Eman y bon amigonan. Piet tabata un consehero legal, pero mas ainda e tabata un bon amigo di Prome Minister Mike Eman. Un persona cu e conoce desde su hubentud cu como conrector na Colegio Aruba tabata parti di su formacion. Piet a yega Aruba na inicio di añanan 70 y a haci di Aruba su di dos pais natal. Como consehero di Gabinete Mike Eman Piet tabata lesa documentonan di importancia pa despues duna su conseho. Prome Minister semper por a conta riba dje cu wowo cera. Pero e tabata haci mucho mas. E tabata percura pa tur cos cana bon na oficina y ken cu tabatin mester di dje por a conta cu e ta scucha nan y si por yega na solucion pa nan problema. Piet tabata un homber stima pa esnan cu a traha cu ne, un homber fuerte y trahado, semper presente den su oficina banda di esun di Prome Minister. Algun luna pasa Piet a bira malo y a cuminsa traha for di cas. Su deseo grandi tabata pa bin bek su oficina. Esaki lamentablemente no a tuma luga. Piet a wordo hospitalisa diasabra y diadomingo su condicion a empeora. Diadomingo anochi Piet rondona pa esnan cu a stim’e, a bay laga nos. Gabinete Mike Eman ta anuncia despues dia y ora di entiero.

Expresionnan haci den e articulo aki no necesariamente ta refleha opinion di ArenaPoliti.co