Nunca antes bisto cu politiconan di e mesun partido ta lanta man pa otro den Parlamento 

ORANJESTAD – Durante conferencia di prensa semanal di partido MEP Evelyn Wever-Croes a para keto na e hecho cu ya a pasa dos siman desde e caso di agresion den Parlamento, pero no tin aclariacion. Es mas, ta varios politico di AVP a pidi disculpa, sinembargo donjonan di curpa mes no. E sucedido aki no por keda sin accion y pesey MEP a entrega un carta na Gobernador di Aruba, na Presidente di Parlamento y na Minister Presidente di Aruba pa urgi nan pa laga hasi un investigacion cu urgencia y presenta Parlamento cu e resultadonan di e investigacion.
Meta di esaki ta pa tene un reunion den Parlamento y tene esnan responsabel cu mester carga nan responsabilidad. Den cualquier otro trabou, si un hende lanta man pa otro, nan ta wordo kita imediatamente. Pesey den e caso aki den Parlamento tambe mester tin accion y sanccion.
Nos a mira integrantenan di AVP bisa cu ta ‘business as usual’, y trabou ta sigi normal. Pero pa nos esey no ta acceptable.

CON BO POR HINCA ESEY DEN BO CABES 
Dia cu lider di fraccion di AVP a insulta Marisol Lopez-Tromp durante reunion publico, AVP a sigi cu ‘business as usual’. Awor bo kier bolbe ignora loke a pasa y sigi cu ‘business as usual’? Te unda bo ta bai? Te ora morto cai? Fraccion di MEP ta bisa TA BASTA.

CHRIS DAMMERS POR LANTA DAL NOS UN WANTA TAMBE 
“Pesey nos no por sigi cu ‘business as usual’. Ki seguridad Xiomara Ruixz-Maduro y mi persona tin, si nos mester reuni cu Chris Dammers y su cabes flip? E ta lanta man pa nos tambe? Pesey nos ta insisti pa e investigacion serca Gobernador di Aruba. Y e gran pregunta ta unda Mike Eman ta awor? En bes di atende cu problemanan serio den nos pais, ta bolbe biaha bai. Semper cu tin problema na Aruba, Mike Eman ta e prome pa bandona barco. Mike Eman ta demostra cu e no por cu presion, realmente un persona sin character”.

SALA DI PARLAMENTO A BIRA SCENARIO DI ABUSO DI HENDE MUHER 
Ta hopi lamentable cu hustamente e sala den cual mester defende derechonan di muchanan, di nos grandinan y di hende muher, abira e scenario pa abuso di hende muher. Y mas tristo ta cu e donjonan di partido AVP, Mike Eman y Henny Eman, kier tapa tur locual cu a pasa. “Cu e hende hombernan di AVP kier sconde loke a pasa, ta comprendible, pasobra nan ta cobarde. Pero cu e hende muhernan tambe ta hasi esey, tin mi hopi decepciona. Ta imposible cu nan no ta hasie di propio boluntad, mi ta sigur cu nan ta hasie bou instruccion di Mike Eman. Pasobra Mike Eman y partido AVP ta fomenta y tolera abuso di hende muher”, lider di MEP Evelyn Wever-Croes a declara.

Expresionnan haci den e articulo aki no necesariamente ta refleha opinion di ArenaPoliti.co