MEP: AVP no tin atencion pa cuido di nos grandinan!
ORANJESTAD – Fraccion di MEP mas cu 3 luna pasa a pidi un debate publico cu minister Schwengle pa atende e tema di cuido di nos grandinan. MEP ta hopi preocupa pa cu e negligencia cu ta continua cu nos grandinan na e casnan di cuido di nos grandinan SABA debi na e problemanan cu escases di personal y promocionan pega, y e manifestacionnan di malcontento na e casnan di cuido. Pa e motibo aki MEP a pidi un reunion publico urgente tres luna pasa caba pa trata e tema aki. Nos grandinan no por sigi bou di e maltrato aki, e no ta husto. Di conbersacionnan cu esnan cu ta traha na SABA tin entendi cu e trahadornan na SABA ta traha bou di hopi presion, cu falta personal, y cu Gobierno no ta duna e subsidio pa cubri e salarionan. Esaki ya caba ta afectando e nivel di calidad di servicio cu nan ta dunando awor. Pero no esey so, sino esey ta pone cu nan no por tuma mas cliente. Esaki ta hopi duro pasobra aparentemente tin 150 persona riba wachtlijst pa drenta un cas di cuido. Hasta SABA a duna di conose cu lo mester sera porta y manda trahadornan cas, of tuma mas medida drastico cu ta afecta e cuido cu nan mester duna.
Tur gobierno tin cu asumi un responsabilidad social pa esnan mas vulnerable den nos comunidad. Na Aruba esey kiermeen cu e gobierno mester encarga pa brinda cuido digno na nos grandinan cu mester di cuido especialisa. Pero e gobierno di AVP cada biaha ta kibra e rol social ey, y preferiblemente no kier asumi e rol social mes. Mike Eman ta gobernando sin asumi e responsabilidad social pero ta impone pa cada hende mes resolve su problema. Si cos ta asina bon na Aruba, dicon nos no por brinda nos grandinan un cuido digno?
Lider di MEP Evelyn Wever-Croes na mas di un ocasion a cuestiona tambe unda Mike Eman ta den e discusion aki? “Pasobra Aruba realmente no tin un prome minister. Mike Eman ta un embahador pa Hulanda cu ta biaha mundo rond pa hasi propaganda pa Hulanda. Awor aki mes e ta na Cuba pa hasi propoaganda pa Hulanda. Nos mester un prome minister na Aruba pa goberna nos pais, pa pone prioridad. Pasobra si nos tabata tin un prome minister na Aruba, e lo a bisa minister Schwengle pa e stop di busca excusa, y soluciona e problema di cuido di nos grandinan. Pero lamentablemente esey ta mucho pidi, pasobra Aruba no tin un prome minister. Mike Eman ta un embahador representando Hulanda rond di mundo”, lider di MEP a duna di conose.
Expresionnan haci den e articulo aki no necesariamente ta refleha opinion di ArenaPoliti.co