Tur tipo di accomodacion existente ta contribui na nos entradanan di turismo. E analisis di Banco Central ta indica esey claramente. Sinembargo e mes un analysis di Banco Central ta mustra cu e contribucion di cada camber di hotelnan regular ta produci mas cu camberanan den hotelnan All Inclusive. E cifranan di Banco Central ta mustra cu segun e dos criterionan principal den acomodacion, e Average Daily Rate y Revenue per Available Room, cambernan di hotelnan regular ta produci mas – te hasta dobel – di loke cambernan di hotelnan All Inclusive ta produci.

HOTELNAN ALL INCLUSIVE 
Esey NO kier men cu nos NO kier hotelnan ALL INCLUSIVE. Hotelnan ALL INCLUSIVE ta existi hopi aña caba na Aruba y awor aki ta percura pa 30% di entradanan di tur hotel na Aruba y un contribucion di mas o menos 720 miyon den economia total. Kier men, cu no por ta intencion di stop of di no kier hotelnan ALL INCLUSIVE. Y aunke e hotelnan regular (EP) ta produci dobel di esey, nos kier pa hotelnan na Aruba tambe por ofrece e pakete di All Inclusive. E ley cu e minister a presenta ta duna tur espacio pa esey tambe! E critica cu e ley lo daña turismo pesey so caba no ta corecto. Al contrario!

MIX IDEAL
Lole nos kier yega na dje ta un MIX ideal di diferente tipo di accomodacion pa satisface e diferente deseonan di acomodacion y servicio di turistanan. E instrumento di regulacion di permisonan pa opera hotel, condominio, apartamento, etc ta netamente pa sigura cu niun tipo di accomodacion ta bira dominante den nos mercado y exclui otronan. Nos mester sigui satisface e necesidad y deseo varia di nos turistanan di diferente gusto pa loke ta e tipo di acomodacion y e tipo di servicio, actividad, recreo y atraccion. Kier men cu e meta mester ta pa yega na e MIX ideal y varia di acomodacion na Aruba. Esaki lo no ta uno statico, pero netamente dinamico, cu ta rekeri un monitoring activo di mercado di viahe den tur e paisnan di unda turistanan ta bin Aruba.

CONDOMINIO Y APARTAMENTO
E mercado di condominio na Aruba tambe ta creciente y ta genera entradanan grandi. E ta crea un demanda grandi pa servicionan varia pa e turistanan cu no ta haya e servicio cu nan lo haya den un hotel. Mescos ta conta pa e apartamentonan cu turistanan ta huur na cantidad. E dos tipo di acomodacion pa turista ta diferente cu hotelnan, pero nan mester wordo regula mescos cu tur otro. Nan mester paga tur belasting mescos cu tur otro. Y en especial e apartamentonan mester ta di un bon calidad pa evita cu mal calidad daña nomber di Aruba of crea otro problema. Den bista di AVP e ley presenta door di gobierno ta crea un instrumento pa crea e mix ideal y varia di tipo di acomodacion pa turistanan na Aruba.

Expresionnan haci den e articulo aki no necesariamente ta refleha opinion di ArenaPoliti.co