E Statuut ta contene e reglanan con nos ta anda cu otro den Reino Hulandes y den esaki tin e posibilidad pa Reino, lesa Hulanda, interveni den e gobernacion di e Paisnan den Reino ora cos bay robes. E intervencion aki no ta wordo activa facilmente, pero solamente ora cu un Pais no ta asumi su responsabilidad pa goberna drechi y riba dje no ta duna señal tampoco di drecha locual ta robes, e ora ey numa Hulanda por interveni pa asina cos no bira pio. Pero pa cada intervencion mester evalua con ta para cu e capacidad di e Pais pa por a evita cu cosnan ta bay robes y tambe pa por drecha e daño cometi. Aki ta na unda cu cada Pais den Reino mester percura pa un bon sistema di ‘checks and balances’ cu ta tene control y ta bati alarma na tempo ora cosnan ta bayendo robes. Si nos tin suficiente ‘checks and balances’ y nos haci caso di locual nan ta señala, nos por evita cu Hulanda ta interveni den gobernacion di nos Pais na e manera cu a sosode na juli 2014 na Aruba.

Cu ‘checks and balances’ ta wordo referi na e control cu mester tin riba e gobernacion di nos Pais. Ta trata aki di e control cu Parlamento di Aruba mester tin riba gobierno, pero tambe e control cu mester wordo eherci door di organonan halto di nos Pais, manera Algemene Rekenkamer y Raad van Advies. Banda di esaki Aruba mester por conta cu e trabou di control cu Prensa, Corte, Universidad di Aruba, Banco Central, Camara di Comercio, ATIA y otro Gremio y Sindicato por eherce na bienestar di nos Pais. Ta e control aki ta trece balance den e gobernacion di un Pais. Na momento cu e control aki bira menos of cay afor, gobernacion por bay for di man y aki ta na unda cu ta habri caminda pa Hulanda interveni na Aruba.

Ora cu nos topa cu señalnan di mal gobernacion nos mester haci algo cu nan y no keda keto y pensa cu e problemanan lo resolve di nan mes. Cada un di nos tin e deber moral cu Aruba pa por contribui na e bon gobernacion di nos Pais. Si nos kier ta un Pais autonomo den Reino Hulandes nos mester asumi nos responsabilidad como tal y nos mester percura pa nos Pais wordo bon goberna. Parlamento di Aruba como e organo di mas halto di control na nos Pais tin e primato pa duna e mihor ehempel den controla y percura pa e debido balance den gobernacion. Pesey Parlamento di Aruba, specialmente e fraccion mayoritario, no por permiti su mes e luho mas di bira cara otro banda ora cu opocicion of otro organonan di control bati alarma y señala mal gobernacion. Parlamento di Aruba a perde hopi tempo caba na discucionnan irelevante enves di a enfoca riba e señalnan cu awe a pone cu Hulanda ta interveni na nos Pais.

Laga e intervencion di Hulanda den 2014 sirbi como ehempel pa nos tur, cu nos mester asumi nos responsabilidad y percura pa un bon sistema di ‘checks and balances’ na Aruba. Esaki ta e unico manera cu nos lo por evita mas intervencion di Hulanda den gobernacion di nos Pais.

12 januari 2015

Expresionnan haci den e articulo aki no necesariamente ta refleha opinion di ArenaPoliti.co