ORANJESTAD: Durante conferencia di prensa semanal di partido Movimiento Electoral di Pueblo (MEP), Parlamantario señor Guillfred Besaril a reacciona riba comentarionan di Minister di Husticia, señor Arthur Dowers kende tabatin e pudor di bin padilanti y insinua cu oposicion ta bati man of oposicion ta contento, hasta cu ta oposicion ta tras di e ola di atraco cu ta asotando nos comunidad. Parlamentario Besaril a declara lo siguiente.

"Ta importante pa recorda Pueblo pero muy en especial e Minister di Husticia actual, cu fraccion di MEP na December 2015 a termina e confiansa den su persona cu motibonan bon argumenta!
Motibonan manera entre otro e servicio di helicopter cu pa mas di 2 aña (e tempo ey) a keda descontinua.
Un servicio di radar operando for di Curaçao y cu Pueblo no ta nada satisfecho cune.
Un departamento di "Warda Nos Costa" cu su personal ta operando sin autoridad defini via un ordenansa y por lo tanto ta practicamente paralisa di juli 2012.
Mas ainda un Cuerpo Policial cu desde su reorganisacion na 2011, a saca un cantidad grandi di personal for di unidad uniforma (straatdienst), manda unidadnan nobo, cu e consecuencia grave cu awe den pleno 2017 no tin e capacidad pa mas cu 1 patruya riba caya na mes momento pa cada districto.

Banda di esaki departamentonan manera Voogdijraad y Reclassering tin añas ta grita pa atencion. Si tuma como ehempel e departamento di Reclassering cu ta crea plannan y proyectonan pa yuda esnan cu a cay den mal caminda pa nan bolbe reintegra den nos comunidad, nos ta nota cu e intencionnan aki a para of a stop completamente pa motibo cu nan no ta un prioridad pa e gobierno actual.

Abase di tur loke mi ta menciona fraccion di MEP den Parlamento a bisa "Ta Basta!" na final di aña 2015. Awe nos ta keda para riba e pensamento cu Minister Dowers no ta e figura pa carga e responsabilidad na trece solucion pa tur loke ta bin ta sucede na Aruba! Su falta di convivencia mes ta bisa suficiente.

E Minister di Husticia actual, semper a keda conta cu e sosten di e fraccion mas grandi den Parlamento. Danki na e hecho aki Pueblo su siguridad ta na unda cu e ta awe; un 2016 cu a cera cu mas di 60 atraco y den e prome 6 simannan di 2017 cu no menos di 15 atraco caba!
Na December di 2015 tabata 5 pa 12 pa nos di MEP!  Nos ta uni nos mes na e sentimento cu ta biba actualmente den Pueblo; Ta Basta! Ni cuanto biaha sr. Dowers bin Staten pa informa Parlamento, e no ta yuda na net nada mas!" Parlamentario Besaril a termina. 

Expresionnan haci den e articulo aki no necesariamente ta refleha opinion di ArenaPoliti.co