Y PA CUMPLI CU PROMESANAN CU OTRO PARTIDONAN A HACI SIN CUMPLI!     
 
"E siman aki di nos dia nacional, ta inaugura tambe e plaza dedica na e autornan di nos himno nacional. Inauguracion di "Plaza Padu" lo ta e culminacion, pa awor, di un cantidad grandi di proyecto cu a stimula nos economia, crea trabou, mehora nos infrastructura y haci Aruba mas bunita ainda." Asina Rene Herdé di e fraccion di AVP den Parlamento a bisa diabierna ora ela bay bishita e trabounan na Plaza Padu hunto cu colega Marlon Sneek y Melvin Tromp.

RENOBACION FISICO 
E renobacion di infrastructura ta un formula conoci cu ta aplica rond di mundo pa stimula economia y crea trabou y entrada nobo. Barack Obama a haci'e na Merca y awor Donald Trump tambe kier bay haci'e. Den caso di Aruba e lista largo di proyectonan ta di scolnan y edificionan (cu tabata den deterioro), centronan di Playa y San Nicolas cu tabata areanan mahos y den deadencia, un hospital nobo cu despues di 40 aña tabata tin mester di renobacion serio, un waf nobo pa carga na Barcadera y un waf nobo na Playa pa turista, barionan cu tabata completamente lubida y cayanan cu pa decadanan tabata roga pa renobacion. Rene Herdé: "AVP no a priminti di renoba nan djis pa gana eleccion. Nos a traha pa gana eleccion pa haci loke Aruba tabata tin mester didje y pa haci tur loke otro partidonan a priminti sin cumpli. Nos a gana eleccion pa porfin haci loke pueblo ta desea. Y no solamente den infrastructura. Djis mira unda nos economia tabata y unda e ta awe. Djis mira con nos fondonan di pensioen tabata bay bancarota y wak con fuerte nan ta para awe. Ta pa haci loke niun otro partido a haci, nos a bay y gana eleccion. E resultado a cambia Aruba pa semper." 

Expresionnan haci den e articulo aki no necesariamente ta refleha opinion di ArenaPoliti.co