STA. CRUZ -- Awe diamars, pa 8or tin e reunion den Parlamento tocante e investigacion di corupcion entorno minister di labor, Paul Croes. Un reunion cu fraccion di MEP a pidi un luna pasa, y a manda hasta un carta elabora pa recorda e presidente di Parlamento Mervin Wyat-Ras riba e urgencia.

Sinembargo e presidente di parlamento den un entrevista a duna di conose cu e mester a tuma un luna di tempo pa e por a evalua e urgencia di e peticion, riba cual sra. Wever-Croes a reacciona "Ta strañami masha cu e presidente tabata tin mester di asina tanto tempo pa evalua nos peticion. Pa cuminsa ningun caminda den reglamento di orden ta para cu e tin e autoridad di evalua un peticion. Pa di dos, den e caso especifico aki nos a hasi dos peticion pa e reunion aki, sumamente elabora, cu tur motibo pakiko tin urgencia den e caso aki. Pues, su splicacion ta incomprendible y totalmente inaceptable.

Ta obvio cu e presidente di Parlamento ta hungando un wega infantil, probablemente bou di instruccion di su lider di partido Mike Eman, pa asina deliberadamente viola nos reglamento di orden cu ta bisa cu drentro di 30 dia e reunion mester wordo teni.

Ta realmente tristo pa mira con e presidente di e organo mas halto constitucional den nos pais, ta hasi mofa di e organo aki.

Durante e reunion lo mi enfoca dicon e reunion ta asina importante. Dicon Parlamento ta esun yama pa carga su responsabilidad. Dicon nos mester manda e señal corecto pa nos comunidad. Mike Eman y su gobierno a faya, y nan a permiti e corupcion aki continua. Nan a scohe pa tapa e escandalo aki, cu nan sa di dje pa mas di un aña y mey. Pues, ta keda solamente Parlamento pa asumi su responsabilidad.

Y pueblo lo sa di husga esnan cu ta para na banda di husticia y na banda di pueblo, of esnan cu ta hasi wega pa sconde e berdad, y pa sigi manipula. Pueblo di Aruba a cansa di politiconan di AVP cu ta bisa un cos y hasi otro cos, cu no tin ningun tipo di credibilidad mas", segun sra. Evelyn Wever-Croes di partido MEP.

Expresionnan haci den e articulo aki no necesariamente ta refleha opinion di ArenaPoliti.co