MEP: Lider di MEP a laga tremendo impresion na Boneiro
Lider di MEP Evelyn Wever-Croes fin di siman pasa a bishita Boneiro pa duna un discurso na un actividad di partido Demokrat na Boneiro. Partido Demokrat y Partido MEP tin lasonan di hermandad di masha hopi tempo, y semper a sostene otro, den bon y den mal tempo.
Den su discurso Evelyn a splica e trayectoria cu Aruba a cana pa por logra su Status Aparte. Den esaki el'a enfatisa riba e trabou cu a wordo hasi internacionalmente pa logra esaki.
Evelyn a enfatisa tambe cu naturalmente e lucha pa haya mas autonomia ta hopi importante, pero ta mas importante pa conserv'e. Aruba no a hasi su maximo esfuerso pa conserva su autonomia, pasobra nos pueblo a scohe gobernantenan cu a maneha nos pais malisimo y awor nos a perde nos autonomia financiero. Aruba tabata un orguyo den Reino, Aruba tabata e inspiracion y e ehempel pa demas islanan den Reino. Pero awor Aruba a para bira e berguensa mas grandi den Reino, y esey ta causa Arubianonan hopi dolor.
Evelyn a splica tambe con MEP lo hasi pa gana e autonomia bek: cu trabou duro, creando confiansa, y mustrando cu nos mes por.
E discurso di Evelyn Wever-Croes a cai den masha bon tera, y a wordo hopi comenta. Por a nota tambe cu hopi hende muher a aserca evelyn pa salud'e y bis'e cu nan ta orguyoso di dje pa tur locual e ta hasiendo den politica. Lider di MEP a laga un tremendo impresion atras na Boneiro, algo cu henter e famia di MEP ta orguyoso di dje.
Expresionnan haci den e articulo aki no necesariamente ta refleha opinion di ArenaPoliti.co