ORANJESTAD – Parlamento a para bira un lugar caminda politiconan frustra ta saca nan gal, y e siman aki no tabata diferente. Pero e biaha aki el’a bin di un skina inespera.

Ningun hende por a pensa cu Mervin Wyatt-Ras lo a rebaha su mes na politica di riool di es forma ey. Hende ta custuma cu Melvin Tromp, Marlon Sneek y Desiree Croes ta comporta nan mes na e nivel ey. Pero no Mervin Wyatt-Ras.

Parlamento tabata trata e presupuesto pa 2015 di parlamento mes, y pa e fraccion di AVP Mervin Wyatt-Ras a hiba palabra. Ora argumento a caba cun’e, ela haya necesario pa durante e reunion di presupuesto, cuestiona si Xiomara Ruiz-Maduro ta suficiente muher si of no. Y e no a keda te eynan pasobra el’a cuestiona tambe si Xiomara cu su 2 mil y pico voto por yama su mes un parlamentario si of no. Un scenario bergonsoso di mira un parlamentario, cu un tempo tabata presidente di parlamento, rebaha su mes di es forma ey na politica di riol mas sushi cu tin.

Pero locual tur hende cu conose Mervin a puntra nan mes, ta kiko a pasa cu Mervin? Kiko ser muher tin di haber cu presupuesto di parlamento? Acaso ta esey ta e discusionnan cu e organo mas halto tin di hiba? Of acaso ta un dilemma cu Mervin ta biba cun’e y den su frustracion a sak’e riba Xiomara? Y dicon mester cuestiona si e 2 mil y pico votonan di Xiomara ta of no ta hasi’e un parlamentario? Un ex presidente di parlamento mester conose su ley y mester realisa cu Xiomara ta un parlamentario escohi pa pueblo cu votonan di preferencia, y simplemente pa esey so e ta un parlamentario, cu Mervin kier of no. Ademas, ta danki na entre otro e caracter fuerte di Xiomara y su trabou duro, awe henter mundo a mira e berdad di e debacle financiero di nos pais.

Xiomara a duna Mervin un contesta cu casi a pone Mervin yora, por a nota cu ela bira masha emocional y su cara a bira cora cora, na momento cu Xiomara a bise cu e ta para 100% manera un muher den su sapato, y e no mester cambia camiseta politico pa por ta parlamentario di nos pais. E sucedido aki a laga un mancha scur atras riba e nivel di parlamento un biaha mas, ora cu argumento caba cu un parlamentario y e mester rebaha su mes di e forma aki y bira personal. Pueblo ta desaproba esaki totalmente

Expresionnan haci den e articulo aki no necesariamente ta refleha opinion di ArenaPoliti.co