"Nos pais ta para dilanti otro momento crucial pa loke ta trata nos presupuesto. Na e crusada aki, aña pasa decisionnan equiboca a wordo tuma, cu tur e consecuencianan negativo pa nos pais. Awor nos ta para na e mesun caminda, y den momentonan asina nos pais ta haya falta di e Minister Presidente. Unda bo ta sr. Mike Eman? Bo ta bay guia bo pueblo den e turbulencia aki, of bo ta bolbe cobardia manera aña pasa ora bo a bay sconde bou di un tent den bo welga di hamber?" ta loke Lider di MEP, sra. Evelyn Wever-Croes ta puntra. 

Mega Debe ta sigui subi
E presupuesto 2015 no ta mustra mucho diferente cu esun di 2014. Mesun prioridadnan equiboca, gastonan di luho, biahe y fiestamento, persisti riba 9 minister en bes di 7, y cantidad di proyecto nobo. Pero di otro banda a corta na forma riguroso y hasta inhumano den beneficio y asistencia na esnan mas vulnerable den nos comunidad. Tur esaki ta causa un deficit atrobe, y ta pone cu e MEGA DEBE ta sigui subi‎ y a consecuencia di esey nos pueblo tin cu paga interes di 550.000 florin PA DIA! CFT, Raad van Advies, Banco Central, tur a duna nan opinion caba: e presupuesto 2015 no ta cumpli cu e maneho di e propio gobierno, ni tampoco cu e rumbo cu Hulanda a stipula y Mike Eman a acepta. ‎Pues nos ta para na e crusada atrobe di un confrontacion cu Hulanda, y en bes cu Hulanda yuda Aruba pa baha e debe y baha e interes, ta parce cu Gabinete Mike Eman ta bayendo linea recta pa un choque frontal. 

Curashi y no cobardia
"Aruba merece mihor, abo merece mucho mihor. Abo merece un lider cu na e momento aki ta mustra curashi, no cobardia. Abo merece un lider cu na e crusada aki ta busca e caminda di solucion cu ta causa su pueblo menos dolor, y no e caminda di confrontacion pasobra esey ta causa su partido menos dolor. Nos pais a conoce lidernan grandi, Betico Croes den feliz memoria y Nelson Oduber cu a logra cosnan grandi pa nos pais. E lider cu nos tin awor ta mustra abati y kibra, e no ta mustra manera un lider mas. Minister Presidente  Mike Eman, kico bo ta bay haci: saca bo pueblo for di e abismo cu abo a hink'e aden, of cobardia un biaha mas? Si bo tin interes den salba e pais aki, mi ta dispuesto pa nos haci'e hunto. Pasobra ta hunto so nos por hiba e pais aki padilanti. Ban debati riba cual ta e mihor solucionnan pa nos pais na e momento aki, y ban pone tur forsa hunto pa logra esaki. Mi oferta ta riba mesa" sra. Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co