Diaranson ultimo lider di MEP Evelyn Wever Croes, hunto cu demas lidernan di fraccion, tabata invita pa forma parti di e panel den Congreso di FTA riba e tema Ombudsman.
E congreso tabata hopi bon atendi y e Ombudsman di Curacao sra Alba Martijn a duna un presentacion con e Ombudsman ta funciona na Curacao. Un defensor di pueblo cu ta sali na defensa di cuidadanonan den e trato cu nan ta haya di gobierno.

"Un pabien na FTA cu e celebracion di 50 anja y cu un tremendo congreso. MEP semper tabata na fabor di un Ombudsman. Sra Zulay van Poppel, tempo e tabata parlamentario pa MEP na anja 2004 ya a traha riba un projecto di ley y despues ami a tume over. Sinembargo pa un Ombudsman ta exitoso e mester wordo carga pa tur hende. Pesey nos a encurasha pa Parlamento henter trek e proyecto aki. Presidente di Parlamento a hasi esaki un prioridad y awor tin un ley di iniciativa riba mesa cu MEP tambe ta sostene.
Tanten no tin un Ombudsman ta e 21 Parlamentarionan practicamente ta fungi como Ombudsman. Varios biaha mi ta yuda hende cu tin problema cu belasting cu a caduca caba, pero no tin e forma pa bringa nan caso. Un Defensor di Pueblo lo por hasi esaki.

Pero tambe un Defensor di Pueblo por atende kehonan di cuidadanonan contra fraude y corupcion. Por ehempel si hende ta cobra placa bou mesa pa duna un permiso of duna un tereno. E Ombudsman sigur lo contribui mesora na mas transparencia pasobra e practicanan coruptivo ey lo stop mesora.

Nos kier pa e instituto di Ombudsman cuminsa funciona liher pasobra nos kier un gobernacion drechi y transparente. Pasobra Aruba merese mihor" lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co