Otmar Oduber: “Mester mira e posibilidadnan cu Cuba por ofrece, enbes di dijes mira nan como un competencia pa Aruba.”
![Otmar co](/images/779x490/Otmar-co.jpg)
Prome Bishita Oficial di Pais Aruba na Cuba
Durante un rueda di prensa na aeropuerto di Aruba, net prome cu e salida oficial Minister Otmar Oduber a comparti algun detaye di e prome bishita oficial di Pais Aruba na Cuba pa estrecha lasonan. Un delegacion diplomatico di Aruba a sali pa Cuba consistiendo di entre otro e director di departamento di asuntonan di exterior, Sr. Edwin Abath, directora di Aruba Tourism Authoriry, Sra Ronella Tjin Asjoe –Croes y Minister Oduber. Lo ta bay tin encuentronan cu Embahada Hulandes establici na Cuba tambe cu 4 Minister di e Gobierno di Cuba, unda lo delibera riba e aspectonan cu ta pertenece na cada un di e ministerionan y e portanan cu ta habri na nivel mundial. Ta hopi ta esnan cu tin interes pa e apertura di Cuba. “Hopi biaha ora nos menciona Cuba, ta pensa riba Cuba como e competencia pa Aruba pa lo cual ta trata turismo, pero di otro banda ta ofrece hopi posibilidadnan economico pa nos isla.” Sr. Oduber ta reitera. Den e cuadro di e pensamento aki tambe tin un delegacion di Camara di Comercio cu a sali pa Cuba cu un mision economico.
Riba e aspecto di mira Cuba como un competencia turistico e mandatario ta bisa cu lo ta bay tin diferente encuentro riba nivel economico pa haya un miho bista di e planan pa Cuba pa e proximo añanan. Lo haya un mihor bista riba construcionnan di hotel, tipo di hotel, kico ta e acomodacionnan, kico ta e producto, e calidad di producto, mira si esaki lo por of si en caso e ta afecta Aruba y mira na ki termino e lo por tin su efecto pa nos pais.
“Mi ta kere cu e diferente encuentronan cu ta bay tin, lo brinda e oportunidad pa Aruba por haci un mihor evaluacion pa e consecuencianan di e apertura aki di Cuba pero tambe ta habri oportunidadnan nobo comercial cu nos ta spera di desaroya den e siman nos dilanti” Minister Oduber a comenta.
Tambe riba nivel cultural tin un biennal tumando lugar di cual Aruba ta conta cu su representacion. Na Aruba otro aña nos lo ta celebrando e di 4 edicion, y e intencion ta pa 2017 Aruba participa na e biennal na Vienna, cu ta esun di mas grandi na nivel mundial. Participacion di nos artistanan den e diferente posibilidadnan internacional aki ta contribui grandemente na e expansion y exportacion di conocemento di nos cultura den exterior.
E mandatario ta finalisa bisando, “Mi ta kere e ta bay ta un siman sumamente activo, hopi ta e encuentronan planifica pa e proximo 4 dianan nos dilanti y na regreso nos lo presenta kico ta e informacion cu ta ricibi y naturalmente tambe posibilidadnan cu ta mira cu Cuba por ofrece, enbes di dijes mira esaki como un competencia pa Aruba.”
Expresionnan haci den e articulo aki no necesariamente ta refleha opinion di ArenaPoliti.co