For di siman pasa e lider di MEP a cuminsa acusa minister di Infrastructura di kier pasa Parlamento un ‘fast ball”; di kier haya aprobacion pa contrui e ‘GREEN CORRIDOR’ den forma scondi. Atrobe mi mester constata cu e y su partido ta completamente FOUT!

ESAKI TA E ECHONAN REAL
Na 2011 Parlamento a trata y aproba e autorisacion pa e minister busca contratista y financiado pa e ‘GREEN CORRIDOR’ te na un maximo di 292 miyon florin. Awor e minister a bini cla y manera a keda palabra e minister ta manda informa Parlamento cu e ta cla pa firma.  Parlamento ta haya dos siman pa studia y reacciona riba e acuerdo cu e minister kier firma. E minister a cumpli manera  ley ta prescirbi. Nada scondi. Nada den pura. Al contrario. Den su carta na Parlamento e minister ta bisa cu e ta welcome e oportunidad pa informa parlamento.
E lider di MEP ta bisa cu e proyecto ta bay surpasa e suma cu e minister a haya autorisacion p’e. Pesey e minister mester traha un ley di autorisacion nobo. Pero e minister NO kier haci esey. Pesey e lider di MEP kier pidi Raad van Advies un conseho si e minister ta sigui e procedura corecto.
Nos tambe a lesa tur cos y nos a busca conseho huridico. Nos conclusion ta:
1)No mester traha niun ley nobo, pasobra loke a duna ta un aprobacion mara na cierto condicionnan y na un suma. Te awor a cumpli cu e condicionnan y NO a surpasa e suma pa cua a haya autorisacion.
2)Den futuro si surpasa e suma durante di construccion, e.o. pasobra e costonan cu a calcula na 2011 a subi miemtrastanto, anto tampoco tin cu traha un ley di autorisacion nobo, pero mester ahusta e suma cu lo mester paga. Y ta den e presupuesto di tur aña ta haci esey. Tin mas ehempel cu esey a sosode. Por ehempel den e caso di e edificio di Belasting y Finansas na Camacuri, eynan mester a ahusta e suma di e huur pa cubri e mantencion, pasobra e costonan a subi compara cu e suma original. No a cambia niun ley ni contract. Pero a subi e prijs di huur pa cubri e mantencion.
Den caso di Air Aruba, a surpasa sumanan y a haci gastonan hopi halto sin cu a traha of cambia niun ley. Ta den presupuesto caminda ta fiha con y cuanto ta paga, a regla esey.  Esey lo sosode den e caso aki tambe! Den e presupuesto.

MEP TA STROBA
Rene Herdé : “Nos ta compronde si e deseo di MEP pa para e proyecto aki y para e desaroyo di henter e area di Pariba di Brug. E ta pas perfectamente den nan strategia di stroba y para e desaroyo di nos pais. Cua forma cu nan haya nan lo usapa haci esey. Sea cu disturbio y intrankilidad , o sea door di crea obstaculonan  manera nan kier haci awor.
Loke mep no ta realisa ta, cu ta pueblo di aruba nan ta perhudica. Ta tur e habitantenan di Pos Chikito, Savaneta, Cura Cabai, Mabon, San Nicolas y besindario nan ta perhudica. Ta e habiotantenan di e areanan aki tin cu usa e caminda peligroso y largo tur dia pa bay trabou pabou. Nos kier pa nan por traha pariba y si nan tin cu uza e caminda pa bin playa, nos kier pa nan ta riba un caminda cu ta mas sigur!”

Expresionnan haci den e articulo aki no necesariamente ta refleha opinion di ArenaPoliti.co