DELFT, HULANDA: Parlamentario, sr. Guillfred Besaril ta atendiendo e “Workshop on the Economics of Information Security” (WEIS2015) na Delft, Hulanda. Participante y profesionalnan di rond mundo a bini hunto den un foro pa discuti e problematica rond di e tema "Siguridad y Privacidad Cibernetico". WEIS2015 ta un foro cu ta trese expertonan di diferente ramo hunto manera economia, ciencia social, comercio, politica y ciencia den technologia y computacion pa hunto yega na solucionan global den e tematica di internet y seguridad global.

WEIS2015 ta un iniciativa anual di TU Delft y The Hague Security Delta. E aña aki e foro di 2015 lo elabora riba iniciativanan presenta den e foro di aña 2014 y di es forma ey analisa e impacto di "Cyber Crime" y atakenan cibernetico riba tanto economia como e derechonan humano, muy en particular di privacidad.

WEIS2015 lo tin como prome orador, sra. Marietje Schaake, miembro di Parlamento Europeo pa partido D66 y miembro di e Alliancia di Liberal y Demócratanan di Europa (ALDE). Sra. Schaake ta enfoca riba comercio, relacionan internacional y tecnologia. Den den cuadro di su funcion den Parlamento Europeo, sra. Schaake lo presenta un disertacion den cual lo elabora riba entre otro situacion den Union Europeo pa loke ta e leynan y cambionan den legislatura cu ta necesario pa atende cu e tematica di siguridad, privacidad y "Cyber Crimes". Ademas lo elabora riba e crisis particular andando ya pa algun aña den Europa, cu ta trece cune cu no ta duna e atencion necesario na e tema "Derechonan Humano y Privacidad".

Un orador importante cu lo participa y duna su aporte na e WEIS2015 lo ta sr. Bruce Schneier, CTO di Resilient System. Sr. Schneier ta entre otro miembro di "Berkman Center for Internet & Society di Harvard Law School" y di "New America Foundation's Open Technology Institute". Sr. Schneier ta un contribuidor, escritor activo di "The Guardian news organization". Sr. Schneier lo elabora riba entre otro su experiencia den e Departamento di Defensa Mericano y lo profundisa su mes den e materia "Cyber Attacks" y formulonan pa construi un miho proteccion contra esakinan.

Fraccion di MEP den Parlamento ta desea collega Parlamentario Besaril y exito cu su participacion na e WEIS2015.

Expresionnan haci den e articulo aki no necesariamente ta refleha opinion di ArenaPoliti.co