Un percentage grandi di nos pueblo ta haña información limita ora ta trata di e estado di nos Gobierno y nos futuro. Gabinete Mike Eman II den 6 aña di tempo a manda nos pais den bancarota. E Gobierno a cuminsa firma varios protocol cu Hulanda contra interés di nos structura estatal/Status Aparte.

Na Augustus 1, 2015 ta e deadline pa Gobierno di Mike Eman cumpli cu protocol firma na Mei 2, 2015. E protocol aki ta liña recto contra nos Autonomia y derecho di Autodeterminación. E protocol aki ta mina e autoridad constitucional di nos Parlamento (Pueblo).
MinPres Mike Eman a hinca nos pais den un estado financiero hamas bisto desde 1986. E la presta y malgasta Miyones sin trece calidad di bida pa nos pueblo. E la practica vriendjespolitiek, clientelismo, aumenta tur e postnan di Goederen en Diensten cu hala di hende pa cana voto, Stichting y tambe yena Gobierno cu hala di coordinador y e famoso arbeidscontractant. E no a crece e economia cu cuponan di trabao nobo. E unico logro den su Gobernacion ta Ritz Carlton Hotel un proyecto di MEP. Awe nos pais ta bancarota.

MinPres Mike Eman a priminiti CFT watchdog di politiek Den Haag cu e lo bin cu 24 Medida riba nos digno pueblo. E la tarda pasobra den e presupuesto di 2014 mester a bin varios di e Medidanan caba. A bini cu un aumento di BBO 3.5% na un manera slordig castigando pueblo cu prijsnan haltisimo den supermercado. A hisa gasoline tres biaha caba den 2015 tur esaki pa tapa e daño di e MEGADEBE Pero MinPres kier sigui manipula e pueblo di Aruba. Sigui presta y malgasta placa cu fiestamento y viahamento lagando su prioridad number un atras cu ta e bienestar di e pueblo di Aruba.

Nos debe nacional ta alrededor di 85% anto si e Gobierno aki no entrega su retiró nos lo yega 105% na 2017. E situación financiero ta caotico y e ta un abuso di marca mayor. No pasobra bo tin 13 asiento ta duna bo e derecho di destruí un pais y crea un desorden total. Hulanda ta co-responsabel pa laga Gabinete Mime Eman abusa di fondonan publico na e manera menciona. A firma un onderzoekopdracht un verlengstuk di e famoso WODC pero asina mes Sr. Eman a usa su poder politico pa crea mas y mas debe. Despues di un aña su welga di hamber fracasa no tin importancia mas.

Nos digno pueblo mester keda alerta pa mobilisa na un manera Democratico y Revolucionario pa exigi e Gobierno aki pa entrega su retiró. Nos pais a bay 20 aña atras den apenas 6 aña di Mike y su Gobierno. Si e Landsverordening (ley pa finalisa e acuerdo di Mei 2, 2015) yega Parlamento na ora nos no por spera nada otro di e Parlamentarionan di AVP nan lo aproba e traición aki y nos lo perde un gran parti di jos Autonomia. Lider di Fracción di AVP Sr. Rene "Baba" Herde no tin credibilidad mas, hasta su mesun colleganan di partido ta yame pa loco. E miembronan di CAFT (CFT nobo) ta cla caba. E master plan di Den Haag ta cla pasobra varios Stakeholders den nos communidad a tapa wowo pa e desaster di 2009-2015. Vox Populi Vox Dei. Solo el pueblo salva el pueblo.

Expresionnan haci den e articulo aki no necesariamente ta refleha opinion di ArenaPoliti.co