Ta parce cu e ansha y desesperacion den seno di partido AVP ta creciendo cada dia mas y mas, caminda nos por mira con e lider di fraccion, Baba Herde ta sigui yobe e medionan di comunicacion cu un sin fin di comunicado sin contenido real, yena cu disparate y mentira. Awor e persona di Baba tin e curashi di papia di sostenibilidad den e pais aki, haciendo como sifuera cu ta su partido AVP a inventa e terminologia aki na Aruba. Relaciona cu e topico di sostenibilidad, den e comunicado ultimo di Baba Herde, e ta mustra su preocupacion pa ‘naturalesa cu ta ser afecta’ y tambe e ta papia di ‘dañamento di medio ambiente sin cu tin un bon proteccion’.

Ordenacion teritorial
Sinembargo den e mesun rosea cu e ta papia di tur e idealnan noble aki, e no ta splica pueblo cu ta su propio gobierno di AVP tur dia ta trapa riba leynan di medio ambiente y tambe ta haci dañonan grandi na nos naturalesa. Hecho ta cu ta su gobierno durante e ultimo 6 añanan tin e Ruimtelijk Otwikkelings Plan (ROP) na werki, caminda nan no ta tene cuenta mas cu e areanan berde “groen gebied” y ta laga verkavel e terenonan aki pa compinchinan politico liga na AVP. Por cierto, e ROP aki a ser introduci na fin di 2008 durante Gabinete Oduber y ta muestra palpable di e vision di partido MEP cu si ta kere den ordenacion teritorial. Contrario na esaki, bao di Gabinete Mike Eman nan tin te ainda e plan descabeya pa laga construi un Parke di Molina na Urirama. Sinembargo te ainda e politiconan di AVP no ta consciente cu segun e ROP  e areanan di Alto Vista y Urirama ta destina exclusivamente pa naturalesa y como tal no por tin edificio, construccion y molina di biento ubica aki. Pero no ta e propio Baba Herde mes den Parlamento a vota pa dal bay cu e proyecto di parke di molina na Urirama y asina afecta e ecologia, naturalesa y salud di e habitantenan den e area aki?

Proyectonan sostenibel di MEP
Un otro apecto di sostenibilidad cu Baba Herde a trece padilanti den su comunicado ta e asunto di generacion di energia na Aruba. Aki e ta declara cu “enbes di uza productonan di petroleo, AVP kier uza energia di solo, biento, awa etc.”.  Pero tur hende mes por mira cu durante e ultimo 6 añanan di Gabinete Eman – fuera di conferencia berde tras di conferencia berde, charla tras di charla, simposio tras di simposio - nada significante a tuma lugar riba e tereno aki. Lo unico cu a ser construi ta e parke solar dilanti Aeropuerto y tambe un plan fantasma pa un Smart Community na Kibaima, cu te ainda no tin fin di wordo realisa. Hecho ta cu te cu awe  e unico cu Gabinete Mike Eman ta bati seca tur dia cune ta e proyectonan sostenibel di Gabinete Oduber, esta e plantanan di awa di Reverse Osmosis, e plantanan di coriente Recip y e Parke di Molina na Vader Piet, cualnan berdaderamente a percura pa reduci drasticamente e uzo di fuel oil cu mas di 30%. Ta pesey mes cu na 2012 un reduccion substancial di e tarifanan di awa y coriente a ser concretisa, danki na e proyectonan visionario aki di MEP.

Finansa publico no-sostenibel
Lamentablemente den e ultimo aña e pueblo consumidor di awa y coriente no por a sigui probecha di un rebaho extra den e tarifanan, ya cu e gobierno corupto cu Baba Herde ta sostene ciegamente a dicidi pa hedge e prijs di fuel oil te cu 95 dollar, siendo cu mundialmente e prijs di crudo a baha drasticamente te cu 50 dollar. Pues aki un biaha mas por mira cu si tin un partido na Aruba cu berdaderamente a kere y a traha incansablemente riba tereno di sostenibilidad, esaki ta partido MEP.
Ta lamentabel si cu Baba Herde te ainda no por of no kier mira kico ta e desaster cu su gobierno di AVP a haci riba tereno di financia publico di nos pais. Creando un crecemento economico ficticio (“groeien”) basa solamente riba fiansa tras di fiansa y cu a crece nos debe nacional te cu 83% di GDP, awe Aruba ta na rand di bancarota y ya caba gobierno ta haya su mes ta corta (“snoeien”) tur caminda y cual ta trece e sostenibilidad den tur sector di nos pais den peliger y cu nos tur lo bay sinti e efectonan negativo di esaki den e proximo 20 añanan. Mirando e panorama tristo aki, ainda Baba Herde tin e curashi y autoridad moral di papia di sostenibilidad?

Expresionnan haci den e articulo aki no necesariamente ta refleha opinion di ArenaPoliti.co