Den conferencia di prensa, Parlamentario sr. Guillfred Besaril a elabora riba e caso lamentabel cu a tuma lugar den weekend caminda cu un taxista a wordo tira den cara. Parlamentario Besaril a declara lo siguiente relaciona cu e sucedido:

"Mi kier bai bek te na e discusionan cu nos Parlamento a hiba durante e tratamento di presupuesto 2015, den cual nos fraccion a expresa nos preocupaccion pa loke a keda presupuesta pa Husticia. Nos fraccion a constata un biaha mas cu tabata trata di un presupuesto irrealistico pa cu e trabownan cu mester wordo ehecuta pa di esnan cu ta labora den e cadena hudicial. E pregunta cu a keda sin ricibi contesta alguno na es momento ey tabata: "Berdad nos Pueblo por sigui sintië sigur asina?" 

Nos a debati ampliamente cu e ciudadano Minister encarga cu Husticia riba su intencion di entre otro baha gasto den su Ministerio abase di traha "dienstroosters" na un manera mas efectivo. Nos a splica di nos banda cu por ehempel Cuerpo Policial ta traha conforme un ordenanza, pues cu no por simplemente Papia di mishi cu e orarionan of e forma di traha di Cuerpo Policial sin cu tin cambio den e ordenanza. Pero e mandatario a keda para ariba cu e tin un bon comprendemento cu e diferente directornan y cu e no tin duda cu lo alcanza su meta di keda brinda Pueblo e seguridad cu nan ta custuma cune muy apesar di ta sigui corta den su presupuesto. Kiko ta e resultado awe? Wel ta resulta cu den un area asina transita y bon bishita pa tanto turista como local manera South Beach, un incidente asina impactante ta sosode!

Nos a adverti como fraccion cu nos fronteranan ta hancho habri pasobra e realidad ta, cu tin un sin fin di irregularidad ta tumando lugar na nos costanan. Pueblo ta constata cu tin un sirculacion alarmante di arma di candela, pa no Papia mes di droga. Como cherry riba e bolo nos comunidad ta wordo sacudi un biaha mas cu un otro caso di atraco cu arma di candela, na momento cu e siman aki un señora ta bira victima di antisocilanan cu ta pone e arma di candela na su cabez pa atrake. 

No solamente durante e tratamento di presupuesto di 2015, pero tambe durante esun di 2014, nos fraccion a bin ta acentua cu e maneho cu ta wordo hiba no ta esun adecuado y cu e no ta un respuesta pa e necesidad di Pueblo. Netamente pa e motibonan aki nos a enfatisa riba un departamento di calidad, caminda cu por drenta Pueblo y hasi e sondeo necesario pa di es forma ey e mandatario ta na altura kiko ta convivi den nos comunidad. Pasobra actualmente nos no ta sinti cu tin e e convivencia necesario di parti e titular di Husticia. Ta di lamenta cu casonan asina ta sigui sosode. Ta di lamenta cu hasta e intencion di su homologo di Turismo ta wordo poni un banda. Tur esaki ta crea mas inseguridad den Pueblo, algo cu nos a bin ta adverti for di 2014, pero sin oido di parti di nos gobernantenan. E ta masha tristo mes, paso na final di dia Pueblo merece miho!" e Parlamentario a termina. 

Expresionnan haci den e articulo aki no necesariamente ta refleha opinion di ArenaPoliti.co