E ta oficial, trabounan di restauracion di Nicolaas Store ta inicia dia 24 di augustus, 2015. Esaki a keda concretisa durante un acto oficial na Monumenten Fonds ora e Contratista Geerman a firma e acuerdo.

Minister Otmar Oduber riba su cumpleaños a comenta cu esaki sigur tabata e miho regalo pa su persona.  Sr. Oduber a bisa: “Nos a traha pa mas di 2 aña riba e proyecto aki, y sigur a purba pone e velocidad su tras pero cu e acuerdo aki nos ta logra e inicio di renobacion di un monumento prestigioso den e area di San Nicolas. Esaki ta un di e piezanan di e puzzel pa locual ta trata e desaroyo di San Nicolas, combertiendo e den capital di herencia cultural di nos isla.” E mandatario ta sigui bisa: “Nos kier atrae cultura, historia y nos custumbernan den area aki haciendo e tambe un atraccion turistico grandi pa Aruba.”

A inicia cu e proyecto di restauracion di Nicolaas Store for di e gobernacion anterior cu e compra di e edificio for di famia Nicolaas. Minister ta sigui comenta: “E plannan cu a sigui despues y decision pa ubica un di e tres museonan cu lo bin pariba den e edificio monumental aki, tur ta parti di e desaroyo cu nos lo mira cana su caminda dentro di poco. Esaki hunto cu e proyecto di Aruba Mural Projects, hunto cu e museonan, hunto cu e espacio di tayer di C.R.A.F.T. ta solamente e inicio y base pa loke ta trata e desaroyo di comberti San Nicolas den e capital di nos herencia cultural.”

E mandatario a felicita Monumenten Fonds pa nan empeño den e ultimo añanan y cu ta hopi activo cu un cantidad grandi di proyecto tur rond di nos isla. Ta canando e caminda legal pa renoba y comberti tambe un otro localidad popular y monumento di San Nicolas, cual ta Uncle Luis Store. Sr. Oduber ta bisa: “No solamente lo restaura y renoba e edificio den su forma original, pero lo percura tambe pa un departamento di gobierno  muda y ubica nan mes den e edificio monumental aki. Esaki pa duna ehempel, cu gobierno ta pone e peso patras di e proyecto y vision cu tin pa haci di San Nicolas e di dos capital turistico cu lo representa cultura aki na Aruba.”

Cu e acuerdo firma pa restauracion di Nicolaas Store, ta contribui na e patrimonio cultural fisico di Aruba. Si tur cos cana segun plan mey mey di aña 2016 San Nicolas lo conta cu un joya di edificio cual lo ta Nicolaas Store completamente restaura.

Expresionnan haci den e articulo aki no necesariamente ta refleha opinion di ArenaPoliti.co