ORANJESTAD – Den un entrevista na Caribisch Netwerk e siman aki Mike Eman a expresa cu e tin un DILEMA. Kiko ta un dilema? Un dilema ta un PROBLEMA cu ta duna dos posible solucion, pero di cual ningún di nan dos ta totalmente aceptable. Eman a expresa cu tin un cumprado serio interesa den re apertura di e refinería, pero cu e tin un problema cu esey pasobra e ora su soño pa mira un Aruba BERDE no por wordo realisa. Y tampoco por bin un hotel na Seroe Colorado. Pero di otro banda, pa Mike Eman soluciona e problema di desempleo, di pobresa, di finanzas y economía no ta un solucion aceptable? Ta kiko a pasa e homber aki?
Pueblo di Aruba, ta sumamente importante pa para keto y analisa e pensamento aki di Mike Eman. Di e expresionnan aki nos por saca hopi conclusion:

1. Mike Eman HAMAS kier a habri e refinería bek. Ta pasobra oposicion a pone tanto presion, el’a haye den e situacion cu e mester a busca re apertura di e refinería. Esaki ta fortifica rumores cu ya Mike Eman a parti e bolo di desmantelacion cu su famianan y esnan hopi cerca di dje caba, y ta logico cu e ora e no kier re apertura mas. Henny Eman a cuminsa cu desmantelacion pero pueblo a pone un paro na esey. Awor Mike Eman a bin pa caba cu e trabou, pero pueblo no ta permiti’e hasi esey.

2. Mike Eman a gaña e desaroyado di hotel na Seroe Colorado. Mike Eman a priminti e desaroyado di hotel na Seroe Colorado cu e ta bai desmantela e refineria prome cu construi e hotel y awor cu e no por desmantela ainda, e tin un problema cu e desaroyador di e hotel. Cu ken su autorisacion Mike Eman a bai priminti e hotel cu ta bai desmantela e refinería? Acaso no ta Mike Eman a priminti na 2009 cu e ta bai habri e refinería bek? No ta cu esey el’a gana elección? Unda e promesanan ey a keda awor?

3. Mike Eman no tin sentimento pa pueblo di Aruba. Mike Eman tin den un man e posibilidad pa scapa nos pais di tanto medida. E tin den su man e posibilidad di crea miles di cupo di empleo. E tin den su man e posibilidad di scapa nos florin di devaluacion. En corto, e tin den su man e bienestar di henter nos pueblo. Pero asina mes e ta papia di un DILEMA? Un dilema ta un problema. Con bienestar di bo pueblo por ta bo problema? Un dilema ta un problema cu ta duna dos posible solucion, pero du cual ningún di nan dos ta totalmente aceptable. Con porta cu pa Mike Eman duna mas di 2000 mama y tata di famia trabou drechi y bon paga, NO ta un solucion aceptable? Con porta cu den un man bo tin MEDIDA y den e otro man bo tin ALTERNATIVA, y ainda bo ta pensa riba un dilema?

Pueblo realisa cu e expresionnan hasi pa Mike Eman diarason ultimo na Caribisch Netwerk ta hopi serio, y ta mustra ki dirección Mike Eman kier hiba nos pais: den decadencai basta cu e por sigi biaha rond di mundo y papia di un Aruba BERDE. Aruba merece mihor. Aruba merese alternativa y no medida! Aruba merese un líder cu a pesar di tur cos, su curason y su compromiso ta cu e pueblo di Aruba. Aruba no merese un líder manera Mike Eman cu único cos cu e ta buscando ta reconosemento personal. Ta tempo pa pueblo core cu Mike Eman!