Pueblo y AVP a demostra cu nan ta fout tur biaha!!! cft

"Ni den gobierno of oposicion! Tur cos cu MEP a priminti den gobierno a keda na promesa. Bo ta corda e futuro briyante y e cinco hotelnan di cinco strea na Baby Beach? Tur cos cu MEP a anticipa den oposicion a keda sin realisa. Anto ariba tur tereno. Awor nan ta anticipa otro desaster cu e ley di supervision financiero. Mescos cu nan a haci durante cinco aña y mey. Pero mescos cu tur loke nan a priminti y anticipa anteriormente, e no ta bay realisa." Asina Rene Herde' lider di fraccion di AVP a contesta e analysis di e lider di MEP diasabra merdia. E lider di MEP a progostica medida y desaster pa Aruba si e ley pasa. Pero en berdad esaki no ta prome biaha cu e lider di MEP ta haci esaki. Y cada biaha e ta resulta completamente fout.

E REALIDAD
E lider di MEP ta prognostica desaster tur caminda y cu tur cos cu gobierno y parlamento di AVP ta haci desde 2009. Pero e realidad ta cu den e cinco aña y mey cu a pasa Aruba a sali for di e pio crisis cu MEP a bay laga nos cun'e. A salba e pension di mas cu 20 mil pensionado cu awe lo tabata cu hopi menos entrada di a lagu'e pa MEP. Den e mes un periodo di 2009 pa awe entrada di trahadornan den gobierno y den enseñansa a bay hopi dilanti. Nan a bolbe haya e  indexering cu MEP a nenga nan pa 7 aña y nada nan no a perde nada manera MEP a y ta bolbe bisa cu ta bay sosode. E realidad ta cu Aruba a sali for di un caida economico nunca bisto di -15% di GDP y bay pa un crecemento di rond di 2% den apenas 4 pa 5 aña. Algo cu niun pais den of pafor di Reino a logra. E realidad aki ta contradeci tur loke e lider di MEP a y ta bisa. E realidad ta cu awor Aruba ta riba e caminda pa recuperacion. Apesar di tur loke a logra den ultimo 5 aña, nos mes ta bisa cu ainda falta. E condicionnan pa un renobacion profundo di nos pais ta wordo poni awor. E proyectonan di infrastructura grandi manera e construccion di e waf nobo na Barcadera y e reconstruccion di e waf di Playa den un waf pa crucero, ta directamente y indirectamente un estimulo fuerte pa nos economia. Hunto cu e renobacion di centronan di Playa y San Nicolas cu ainda ta den ehecucion, e ta stimula e economia di turismo, cu tambe MEP a laga ta bay atras y tur dia ta desea pa e bay malo. E proyectonan di infrastructura di e "Green Coridor" entre Playa y San Nicolas ta bay crea e estimulo pa "Pariba di Brug" cu tur experto a prognostica y tur gobierno a desea pa ultimo 40 aña. Awor si e ta bay sosode. Apesar di circunstancianan den mundo y den nos region cu a y ta afecta tur pais, nos pais a sa di evita of minimalisa e efectonan pa Pueblo. Aruba tin un seguro medico pa tur hende! Wak cuanto pais tin esey. Aruba tin un sistema di pensioen cu awor ta sigura entrada di pensionadonan pa decadanan cu ta bin. Cuanto pais por sigura nan pensionadonan esey awe. Aruba tin un sistema di enseñansa cu ta ofrece tur studiante un oportunidad pa un carera cu ta miho cu nan majornan. Esey apesar di renobacionnan cu mester tuma luga den enseñansa lihe. Loke AVP a haci den gobierno den ultimo cinco aña y mey, ta djis un motibo mas pa contradeci MEP y su lider. 

Expresionnan haci den e articulo aki no necesariamente ta refleha opinion di ArenaPoliti.co