CONGRESO DI MEP 2015 NA CAMINDA 

SANTA CRUZ – Ya ta 4 anja pasa cu Nelson Oduber a pasa e timon di e partido geel over na Evelyn Wever-Croes, despues cu Congreso a eligi Wever-Croes lider di MEP. Despues di e goberna e pais aki 4 biaha, Nelson Oduber a bandona poliítica lagando un legado atras di bon gobernacion. Nelson Oduber no solamente mester a lucha contra e partido oponente AVP, sino tambe contra madre patria Hulanda cu tabata tin un actitud hopi riguroso contra Gabinetenan di Oduber, algo cu desde 2009 a cambia completamente, y cu ta responsabel pa e debacle financiero den nos pais.
Asina mes Nelson Oduber hunto cu su gabinetenan a lidera e pais aki, sin nunca haya un KB, sin nunca wordo poni bou di curatela, sin nunca mester a rebaha su mes pa bai den welga di hamber. Nelson Oduber y su ministernan tabata hendenan cu a sa di goberna na forma responsabel.
Te hasta e rapport di WODC su conclusion ta cu e acusacionnan tabata basa pa 90% riba redashi, cu excepcion di e maneho di ex minister di MEP Marisol Lopez-Tromp y negoshi di tereno cu a laga duda atras.
Nelson Oduber a demostra ta con ta goberna, y hasta CFT awor ta dun’e elogio, pasobra CFT a pone como exigencia riba Mike Eman pa hiba e pais bek financieramente manera MEP a lage na 2009, pero esaki lamentablemente lo dura 24 anja.
4 anja pasa Nelson Oduber a pasa e timon over pa Evelyn Wever-Croes, cu durante e ultimo 4 anjanan mester a reconstrui un partido kibra pa traiciOn. Traicion di propio politiconan di MEP. Sinembargo Evelyn Wever-Croes, asina mes e competencia tabata fuerte pa MEP cu no tin e miyones cu AVP si a hinca den su campanja, placa cu ningun hende sa di unda e ta bin, asina mes Evelyn Wever-Croes a hiba un campanja honesto y directo, y a sa di tene e partido hunto, y gana casi tur e asientonan bek di esnan cu a bula cura.

Durante 4 anja hunto cu Fraccion di MEP, a hiba oposicion riguroso y fuerte, habriendo wowo di un y tur cu e maneho di gabinete Mike Eman tabata malo. Pasobra mientras Mike Eman tabata enganja tur hende cu el’a hasi un “bon trabou”, Evelyn y fraccion di MEP a demostra cu prueba cu cos tabata bayendo hopi malo! Y awor tur hende ta duna MEP rason.
Awor 4 anja despues, Conseho di Partido di MEP consistiendo di tur e politiconan, tur e presidentenan di directiva y tur e miembronan di directiva unanimamente a dicidi pa re eligi Evelyn Wever-Croes durante Congreso 2015 pa aclamacion. Un mocion presenta pa colega di partido Glenbert Croes, mustrando confiansa pleno den lider Evelyn Wever-Croes, y  cu a wordo sosteni pa tur esnan presente. Evelyn Wever-Croes ta un dama, cu semper a comporta na forma ehemplar. Evelyn Wever-Croes ta un mama y ta convivi cu e dolor di pueblo. Evelyn Wever-Croes ta un profesional prepara, y ta e unico persona cu awor por saca Aruba for di e crisis financiero, y gana nos autonomia bek. Pesey e gran famia di MEP ta sosten’e, y lo sosten’e durante Congreso 2015 cu ta programa pa tuma lugar dia 27 di september proximo.
MEP ta  e unico speransa pa Aruba sali for di nubianan scur ocasiona door di e mal maneho di AVP, y lo percura cu solo lo sali pa nos tur. MEP a demostra cu ta e unico partido cu tin nos pais realmente na pecho, y cu realmente por hasi un diferencia . E unico partido cu lo lucha pa nos pais por prospera, y lo trese bienestar pa tur riba Aruba.

Expresionnan haci den e articulo aki no necesariamente ta refleha opinion di ArenaPoliti.co