Solo ta Sali pa Nos Tur, ta e lema nobo di Movimiento Electoral di Pueblo MEP. Durante e Congreso di MEP 2015 a unifica e pueblo hamas bisto treciendo hunto campañador, simpatisante, cacique, simpatisador y votadornan riba un solo dia. Tabata un Cas di Cultura completamente yen, tanto den e sala grandi como e demas salanan. Ariba e dia aki nos Lider maximo sra. Evelyne Wever Croes a trece na conocemento di tur presente e lema nobo di MEP, esta ”Solo Ta Sali Pa Nos Tur”. Cu e lema aki a ser demostra cu a yega e momento cu Aruba mester lanta para y sali padilanti na defensa y pa un solucion pa cu e situacion cu nos pueblo ta den na e momentonan aki. E unico forma cu por logra esaki ta atraves di unificacion di nos pueblo sin ningun diferencia di color politico, rasa, edad y religion.

Solo Ta Sali Pa Nos Tur
Manera e dicho ta bisa, despues di cada tempestad, Solo ta sali Bek, y esaki ta e momento cu solo tin di sali pa nos tur mirando e tempestad financiero cu e Gobierno di Mike Eman y AVP a hinca nos aden. Sra. Evelyne Wever Croes a enfatisa na diferente ocasion durante e Congreso y a pidi tur esnan presente hiba e mensahe, cu awor ta e momento cu nos bon Dios nos dilanti nos tin di lucha man den man y cu e unificacion cu nos Señor mes a siña nos pa biba y sali padilanti manera homber y muhernan balente y logra nos meta di salba nos pida baranca “Aruba”.
Si nos no lucha awor pa salba nos mes y nos Aruba for di garanan di hendenan cu mente maligno di e gobierno Mike y AVP, ta ken lo defende nos?
Sintibo orguyoso di ta un Arubiano, sintibo orguyoso di nos grandinan cu a lucha pa nos y awor ta nos turno pa hiba e lucha pa nos grandinan y alaves nos criaturanan. Sin excepcion manera menciona bo ta biba riba e pida baranca aki yta toca n’abo pa defende bo derecho constitucional como un conciudadano cu tur derecho ariba e pais aki, mi Pais, Bo Pais!

Unificacion
Pueblo lanta ariba, awor ta e momento pa abo tambe unifica na Movimiento Electoral di Pueblo cu si tin e plan y e forma di salba nos pueblo. Movimiento Electoral di Pueblo na e momentonan aki ta e unico alternativa pa salba nos pueblo di e garanan maligno aki. Solamente cu bo unificacion y cu Dios padilanti nos lo logra esaki pabo, pami y pa tur nos yiu y nan yiunan. Awor mas cu nunca Movimiento Electoral di Pueblo ta mas uni cu nunca y mas cerca di bo y di e pueblo. No tene miedo y unifica bo mes. Awor ta e ora y Movimiento Electoral di Pueblo mester dibo y di bo famia. MEP, un partido Social Democrata semper a lucha pa defende nos Pueblo desde inicio  di nos partido y cu un solo meta y deseo di nos libertador Sr. Betico Croes (DFM) pa semper defende y unifica e pueblo Arubano.
Adhunto por aprecia diferente potret cu ilustracionnan di unificacion cu mas cu nunca ta reina den nos partido Movimiento Electoral di Pueblo MEP. Danki Aruba pa e sosten ricibi durante Congreso 2015 y hiba e mensahe pa bo famia, bisiña, conocirnan pa unifica cu MEP pa hunto y cu e bon Dios padilanti pa nos salvaguardia nos dushi baranca cu yama Aruba durante e proximo eleccion. MEP ta di mi, MEP ta di bo y MEP ta di nos tur y MEP lo keda pa semper cu bo sosten y confiansa. Biba MEP!

Expresionnan haci den e articulo aki no necesariamente ta refleha opinion di ArenaPoliti.co