No pasobra algo ta custumber mester sigui hacie 

Despues cu diadomingo Minister Otmar Oduber a yega na un acuerdo cu e Asociacion di Controladornan Aereo pa loke ta trata e uso di Ingles y Spaño pa comunicacion entre toren y pilotonan, el a sinti e necesidad di bin cu un splicacion mas detaya mirando algun comentario cu a bin for di skina di Parlamento, specialmene di dos miembro di Parlamento.
E mandatario a bisa cu e ta lamenta cu como miembro di Parlamento no a haci e preguntanan por escrito na e Minister of invite pa un vragen uur, reunion publico of comision central riba e sucedidonan, mientras cu di otro banda ta saca hopi conclusion y ta bin dilanti cu hopi comentario cu lo por crea un tipo di panico of un percepcion di loke no ta realidad.
Den e cuadro aki y pa trece tur claridad necesario Minister Otmar Oduber a presenta tur documento pa mustra cu si con mes tabata bay robez den pasado, maneho actual ta pa drecha esakinan pa cosnan bay manera debe ser y percura cu ta cumpli cu tratadonan internacional cu tin y sigur cumpli como pais cu loke a wordo poni padilanti.
Henter e discusion tabata riba e aspecto di idioma caminda cu esaki a wordo poni halto riba agenda ya caba for di basta aña pasa, for di 2008 y a wordo publica den e Aeronautical Information Publication (AIP).
E AIP  ta ilustra e condicionnan y reglanan cu mester cumpli cune ora di bula pa Aruba y cu ta publica na mundo henter. Akiden a wordo publica for di 2008 cu e idioma usa den comunicacionnan entre toren y pilotonan ta Ingles y ningun otro. Den e mesun documento aki ta wordo referi tambe bou di idiomanan cu ta wordo utiliza cu ta Ingles of Ingles, cu otro palabra no tin otro idioma cu no ta Ingles.
Minister Oduber ta bisa cu e AIP a wordo saca e tempo ey na momento cu Aruba tabata bezig ta wordo geaudit dor di ICAO y mirando cu reglanan di e instancia aki ta compromete kico ta e lenguahe cu tin cu usa, a stipula cu esaki lo ta Ingles. For di e tempo ey te cu dia di awe e no a wordo cambia.
Pa loke ta trata anexo 10 riba cual hopi ta wordo papia, ta bisa cu e e comunicacion radiotelefonico entre toren y pilotonan mester wordo conduci den e idioma usa normalmente pa e stacion na tera, den e caso aki e ta Papiamento, of Ingles y ningun otro.
Den e nota 1 di dje ta bisa cu e idioma normalmente utiliza pa e stacion na tera no necesariamente lo mester ta esun di e estado caminda e ta localiza, pero den nos caso e ta asina. Lo por yega na un acuerdo riba un idioma regional comun como rekisito di e stacionnan na tera di e region, pero no tin ningun acuerdo pa cu esaki. Kiermen no por bisa cu “pasobra algo ta custumber nos ta bay sigui hacie. Pasobra si dia di mañan algo mester sosode, Dios spaar nos, na momento cu bo a comunica den un idioma cu no ta conforme cu tratadonan cu ta riba ley internacional y cu bo a confirma den bo AIP, e ora ey Aruba lo wordo poni personalmente responsabel, no e expertonan cu ta papia awe, no esunnan cu ta bisa cu nan ta certifica, no esunnan cu ta traha den toren, pero e Gobierno y e Minister na turno. Mi persona como Minister di Transporte mester percura pa ley wordo ehecuta y ey ta caminda nos ta na e momentonan aki.”, Minister Oduber a declara.
Continuando el a bisa cu ora e tende cu ta bisa cu e region Corsow, Venezuela y Aruba por palabra e uso di un idioma, e mester referi e persona aki na loke ICAO ta defini como region, cual den e caso no ta djis un area chikito, sino p.e. Sur America, Centro America, etc.
Minister Otmar Oduber a declara enfaticamente cu si Parlamento desea cu su persona haci algo cu ta bay contra di e tratadonan internacional, contra loke Aruba mes a manda bisa na mundo via e AIP cu ta Ingles so nos ta papia, anto e ora ey Parlamento mester dune e opdracht y mester carga nan responsabilidad tambe como Parlamento pa bay en pugna di e reglanan internacional.

Expresionnan haci den e articulo aki no necesariamente ta refleha opinion di ArenaPoliti.co