Pa pueblo e ta dificil guli e pilder cu e sistema nobo di cobransa lo no bay costa mas. Den principio nan tin rason pasobra e declaracion haci door di Minister di Finansas ta uno cu ta contradeci su mes y logicamente esaki ta crea iritacion. Netamente pa e motibo aki nos kier splica dicon su ponencia no ta cuadra cu realidad.

Segun bo tank bo ta paga
Na promer lugar el a declara cu e cambio aki ta budget neutral. Den principio esaki lo mester nifica cu pueblo NO ta bay paga mas na loke e ta custumbra di paga, por ehempel e 320 florin. Ta bon pa pueblo sa cu anualmente Servicio di Impuesto ta colecta aproximadamente 20 miyon florin na motorrijtuigenbelasting, pues den e caso aki e sistema nobo lo ta suppose di trece mesun tanto placa y no mas. Pero e Minister di Finansa den mesun rosea ta subraya cu "segun bo ta tank bo ta pague", pues cada bishita na pompstation lo nifica cu bo lo bay ta pagando e motorrijtuigenbelasting pa cada liter cu bo tank. E frecuencia lo bay determina con hopi bo ta paga, pues aki bo no por ta papia di budget neutral mas. Remarcabel ta cu un sistematica asina bo lo no por controla y ta mas cu logico cu bo ta confronta bo mes cu e hecho cu kier of no, husto of inhusto bo ta obliga di paga mas. Aunke cu Minister di Finansa a papia di calculacion, mester enfatisa cu e no ta posibel pa haci 1 solo calculacion pa bo yega na un suma ideal. Tin mas cu 60 mil auto ta core riba Aruba y cada un tin diferente uso. E ta masha facil pa papia cu e lo ta budget neutral pero 1 calculacion no ta representa tur e casonan individual. E asunto ta uno complica y hustamente esey nan mes a laga sa. 

Gobierno no sa kico pa haci
Pueblo mes a ripara cu te cu awor Minister no a divulga kico lo bay ta e costo di accijns pa liter. Pueblo mester ta na altura cu na e momentonan aki caba ta pagando 61.4 cent na accijns pa cada liter cual costo ta basta halto. Si gasolin subi of baha mes Gabinete Eman no a baha loke e ta cobra pa cada liter. Pues cu cambio den cobransa di motorrijtuigenbelasting automaticamente esaki lo subi. 
E secrecia cu tin awor relaciona cu e cambio y limitacion den duna informacion logicamente ta duna e impresion cu e motibo principal ta pasobra Gabinete Eman no sa precies kico pa haci. E ponencia cu ta wordo treci padilanti cu lo ta mucho tempran pa duna informacion ta uno absurdo debi cu falta apenas algun siman so den aña 2015 pa nan bay trata e ley y Gabinete Eman kier introduci’e entrante januari 2016. 

Dos ehempel di calculacion
Apesar cu 1 calculacion no ta representa tur caso individual na Aruba ta importante pa pueblo haya un idea di kico e cambio lo por costa nan. Ehempel 1: Si un persona ta tank full 5 biaha pa luna y su capacidad maximo di tanki auto ta 50 liter lo nifica 250 liter pa luna. Den un aña esaki ta 3000 liter. Si presenta un scenario cu Gabinete Eman dicidi di cobra 0.20 cent lo nifica  cu bo lo paga na motorrijtuigenbelasting 600 florin. Ehempel 2: Si presenta un scenario cu Gabinete Eman dicidi di cobra  0.30 cent lo nifica  cu bo lo paga na motorrijtuigenbelasting 900 florin (3x mas!) Den un ehempel manera specificamente presenta e unico manera pa e por keda budget neutral ta pa cobra 320/3000 liter= 0.106 cent pa liter, pero for di paden nos por a compronde te na e momentonan aki cu e lo ta mas halto. Y si resulta asina mes bo mester tene cuenta cu e ehempel cu nos a duna ta uno basa cu bo ta tank 5 biaha pa luna pero realidad ta cu gasolin ta evapora liher y bo ta bay hayabo ta tank mas biaha cu consecuencia bo ta bay paga mas di loke bo a custumbra. 

Nunca gobierno ta sali perdi
Tene cuenta cu e cifranan ta un baloracion y no necesariamente ta refleha bo caso personal pero ta djis un ehempel pa ilustra con cos nan por bay cana cu cobransa di motorrijtuigenbelasting ora di cumpra gasolin. Logicamente e ta bay varia pa tur hende dependiendo cuanto biaha bo ta tank y capacidad di e tanki di bo auto. E ta obvio cu e intencion di gobierno aki ta uno sinberguensa! Pueblo no mester laga Gabinete Eman gañabo cu e cambio lo ta budget neutral te ora cu di berdad nan presenta calculacion final. Un cos ta sigur, loke sea e cobransa pa liter ta bay bira Gabinete Eman nunca ta bay sali perdi cu e cambio aki. No mester lubida cu tur e cambionan aki ta pa genera placa mescos tur otro medida y reforma fiscal na caminda. Ademas Gabinete Eman tur e tempo cu a pasa no a ni absorba accijns, tampoco aumento di coriente corda nummerplaat. Pero si kier castiga abo rancando mas placa di tur manera cu ta existi for di bo. Awor e ta obvio nan programa di gobernacion yama "CASTIGA PUEBLO"! 

Expresionnan haci den e articulo aki no necesariamente ta refleha opinion di ArenaPoliti.co