Durante seminario di AHRA.

Minister Bermudez: “Mester inverti den  liderazgo, motivacion, educacion y evaluacion  pa nos enfrenta e retonan grandi nos dilanti”.

ORANJESTAD - Diabierna ultimo, Minister di Finanzas a inicia e seminario y exposicion di Aruba Human Resources Association (AHRA) cu un discurso unda cu e la profundisa riba e obstaculonan cu Gobierno mes ta enfrenta diariamente riba e tereno di organisacion gubernamental. Ademas di e importancia di tur esfuerso desplega pa nos departamento di recurso humano y su profesionalnan.

Entre e retonan den e tereno di organisacion Gubernamental, no tin duda cu e maneho di recurso humano ta hunga un papel fundamental. Minister Bermudez a menciona por ehempel e trabou enorme cu departamento di recurso humano a realisa e aña aki pa cu e atrasonan existente cu tin di haber cu e formalidadnan manera huramentacion, hubileo y promocion di tur empleado di Gobierno.

Banda di esey e mandatario a manifesta cu banda di preferencia politico, un di e factornan complica den e maneho di recurso humano ta cu e falta di liderazgo den diferente departamento tambe ta un realidad. Esaki ta contribui na un falta di motivacion, educacion como tambe evaluacion debido di tur empleado di Gobierno. “Esaki ta trece cun’e cu e calidad di servicio cu Gobierno por ofrece na comunidad ta mediocre”, e mandatario a indica.

E no ta un secreto cu mas cu mita di Aruba su presupuesto nacional ta encera gastonan di personal y cu anualmente e gastonan aki ta aumenta automaticamente. Pa es motibo tambe Minister Bermudez a splica cu desde aña pasa Gobierno ta hasiendo tur empeño pa reduci e aparato di Gobierno cu un areglo pa salida boluntario, esta un ‘VUT regeling’, combina cu un paro di reclutacion. Consecuentemente solamente p’e puestonan clave a recluta candidatonan cu educacion nivel HBO y ariba.

Segun e mandatario di finanzas, e maneho riba tereno di recurso humano lo enfrenta cambionan grandi, sin embargo e reforma aki no ta un proceso cu lo tuma luga di un dia pa otro. Minister Bermudez ta consciente di tur e obstaculonan grandi cu Gobierno mester trata ainda. “Sometimes things have to go left, before they can go right”, asina Minister Bermudez a expresa diabierna mainta den su discurso inaugural.

Minister Bermudez ta positivo cu pa proximo aña asina cu e “kerntaken analyse” wordo finalisa cu Gobierno lo por determina e servicionan cu nan lo sigui brinda na nos comunidad dentro di e realidad financiero, indicando e restonan cu lo por wordo ofreci pa e sector priva. Na mes momento e mandatario a indica cu tin tranformacionnan grandi na caminda pa departamento di recurso humano cu lo garantisa cu nos aparato Gubernamental lo ta ekipa pa recluta profesionalnan capaz pa ehecuta e plan strategico di Gobierno y logra e metanan proponi.